Марий Эл правительствын да Кугыжаныш Погынын темлымышт почеш «Марий Эл Республикыште посна категорий граждан-влаклан социальный поддержке да социальный обслуживаний нерген» законыш региональный ава капиталым тӱлымӧ шотышто ужашыш вашталтыш пурталтын.
Тиде вашталтыш 2017 ий 14 октябрь гыч илышыш пурен. Шуко шочшан ешлан социальный полышым пуымо шот дене нылымше але утларак йоча шочмо але эргылыкеш (ӱдырлыкеш) налме годым 2012 ий гыч республикыште единовременный выплате тӱлалтеш. Тудын кугытшо — 58 тӱжемат 379 теҥге.
Законыш теве могай вашталтыш пурталтын:
— тиде окса кызыт судитлыме але ончыч судитлалтше, икшывыж шотышто преступленийым ыштыше ача але авалан огеш тӱлалт;
— тыгай годым тудым весыжлан, титакдыме, осал пашам ыштыдыме ачалан але авалан, тӱлат;
— ача-ава коктынат але иктыже шкетын икшывым кушта да судитлалтше лийын але кызыт судитлыме гын, тыгай годым окса йочалан але йоча-влаклан ийготыш шушо лиймекышт, иктӧр пайлалт тӱлалтеш.
Ончыч ава але ача – когыньышт кокла гыч кеч иктыже – шочшыжо але шочшыжо-влак шотышто преступленийым ыштен улмаш гын, тиде ешлан ава капитал йӧршеш тӱлалтын огыл. Тиде амал дене республикыште 18 ешлан ава капиталым тӱлаш чарыме улмаш.
Ты законыш вашталтышым пуртымо дене ончыкыжым тиде оксам пуымо порядке да индексаций шотышто вашталтыш лийшаш.
Палемдыман: 58 379 теҥгем ешлан икшывын шочмекше але йочам эргылыкеш (ӱдырлыкеш) налме деч вара ик ий эртымеке гына тӱлат. Тудым кучылтмо шотышто нимогай чарак уке. Ты оксам кажне еш кузе шона, туге кучылт кертеш.
Единовременный выплатым Марий Эл Республикын Социальный вияҥмаш министерствыже районлаште да олалалште калыклан социальный полышым пуымо рӱдерла гоч ойыра.
Л.Камалетдинова.
