Советский районысо Кельмаксолаште изак-шоляк Рябининмыт ден изак-шоляк Комаровмытым шарныме лӱмеш футбол дене турнир эртен. Тыгай сынан спорт мероприятий кумшо гана лийын. Тушто У Торъял, Оршанке, Кужэҥер, Советский районла (эше самырык-влакын кок командышт) гыч куд команде таҥасен.
Талын модмаште Советский районын «Звезда» командыже ончыко лектын. Финалыште тудо Кужэҥер гыч «Гранит» командым 2:1 счёт дене сеҥен. Такшым тӱҥ матч 0:0 счёт дене мучашлалтын. Советский районысо спортсмен-влак пенальтиште сеҥымашым кондышо голым пуртеныт.
Турнир деч вара эн сай капка орол А.Кошкинлан, эн сай модшо М.Павловлан, эн сай нападающий А.Таныгинлан посна пӧлекым кучыктеныт. Кумытынат «Звезда» командын футболистше улыт.
