«Шке пӧрт – шкендынак» | Марий калык газет

Ыштыш кучыш-келшыше, шӱм-чон куана

«Шке пӧрт – шкендынак» –

ойла Советский район Вечын селаште илыше кидмастар Ярослав Ведерников.

Тудын суртшо урем дене эртыше кажне еҥлан келша, очыни. Оралте пелен сад-пакча ужарген шога. Толмына годым суртоза пече ден капкам ышта ыле. Йодмына почеш тудо сурт-печыжым ончыктыш.

Ярослав Шернур район Моркэҥер ялеш шочын кушкын. Пелашыже Элина Валерьевна «Акашевский» сурт-кайык фабрикыште тырша. Кум йочашт уло. Ярославын шочмо ялже пыташ тӱҥалын, сандене пелашын кундемышкыже куснаш логалын. Эн ончычшо нуно Гришино ялыш илаш толыныт, а вара Вечын селан у уремыштыже суртым ыштеныт.

90 квадрат метр кумдыкан у суртлан проектым Ярослав шкежак ямдылен. Суртоза дене ме оралте пеленак келыштарыме телымсе садыште мутым вашталтенна. Кокымшо пачашыш мотор тошкалтыш кӱзыкта. Вара пален нальым: тудымат пӧръеҥ шкак ыштен. Кызыт пошкудылан фундамент гычак мончам нӧлтен шынден. Икманаш, мастар еҥлан паша эре уло. Шке жапыште Озаҥ олашкат вахте йӧн дене коштын…

Пӧртын икымше пачашыжым ош кермыч дене оптымо, а кокымшо пачаш – каркасан. Тӱжвачын оралтым блок-хаус дене комыжлен, тыге суртшо волгалтеш веле. Суртозан ойлымыж почеш, чылажге шканже ынде кум суртым чоҥен.

– Мый шкеже каменщик, электрик, сварщик улам, – ойла Ярослав. – Пошкудын йодмыж почеш коҥгамат оптенам. Теве ынде тудланак шокшым пуышо системым ыштем.

Сад-пакчажымат ончен лекна. Тушкыжо карликовый олмапум, грушым, сливым, виноградым шындыме. Олмаже гын поснак чевер. Кудывечыште суртозан мотоблокшо да адакат шке ыштыме орваже коеш. Туштак – квадроцикл. Эргыштлан сайын тунеммыжлан налын пуэныт улмаш. Тыгак Ярослав пареҥгым лукташ копалкым поген. Икте веле тудым тургыжландара: тиде уремыш пӱртӱс газ пучым шупшмо огыл. Суртым пу, тыгак электровий полшымо дене ырыкташ логалеш.

– Ялыште илаш шонет гын, шке суртыштак илым ан, тунам гына чылажат воктенет лиеш, – ойла суртоза.