НОВОСТИ ПАТЫРЛЫК УВЕР ЙОГЫН

Шарнымаш кажнын чонышто илышаш

1 июль – сӧй кредалмашын ветеранже-влакын кечышт. Тиде амал дене Морко районысо Унчо селаште Афган сарыште, Чечня, Сирий мландыште служитлыше да мыланна тыныс илышым пӧлеклаш полшышо ветеран-влак ятырынак погыненыт.

Тӱрлӧ ийлаште да тӱрлӧ сӧйыштӧ лийше салтак-влак илаш-колаш кредалме пагытыштым шинчавӱд йӧре шарналтеныт да локальный сарлаште лийше ветеран-влак лӱмеш стелле ончылан пеледыш аршашым пыштеныт.

Ты гана вашлиймашке Морко, Параньга районла, Татарстан Республик гыч ветеран-влак чумыргеныт. Ӱмаште стелым почмо годым орден да медаль-влак дене палемдалтше-шамыч кажне ийын 1 июльлан Унчо кундемыште погынаш кутырен келшеныт улмаш.

Марий кундемнан чолга да патыр эргыже-влак чынжымак шуко боевой действийыште лийыныт. Кажныже шкенжым лӱддымын ончыл радамыште ончыктен да товатлыме мутшылан ӱшанле кодын. А тыгайышт нерген кушкын толшо тукым палышыш, вет нуно чылалан пример улыт.

Вашлиймашым шарнымаш стелле воктене эртарыме — моткоч кӱлешан. Ме йолташна-влакым шарналтен кертына. Шарнымаш ила гын, нимогай сар огеш тол, тыныс илыш лиеш, а вуй ӱмбалне канде кава, чевер кече куандараш тӱҥалыт, – чонжым почо Морко район Ямбатыр ялыште шочын-кушшо, а кызыт ешыж дене Йошкар-Олаште илыше афган сарын ветеранже Эдуард Гаврилов.

Илышда волгыдо лийже, ветеран-влак!

А.БАЙКОВА

Опубликовать в Одноклассники

Добавить комментарий