Сӧрымынам эртыше шочмын, 18 январьыште, шуктышна – редакцийыштына «Марий Эл» ден «Сурт-пече» газет-влаклан возалтше-шамыч коклаште лотерейым модылтышна. Кугу ӱстембаке квитанциян конверт-влакым луктын пыштышна, нуным сайын варышна да тӱҥ редактор Александр Абдулов, алмаштышыже-шамыч Светлана Пехметова ден Евгений Садовин, кадр йодыш дене инспектор Елена Васильева да мый черет дене луктедышна – тыге черетан призым модын налше пиалан еҥым рашемдышна. Шижам, газетым лудшо йолташын чонжо вургыжеш: кӧн мом модын налмыжым палынеже. Тыге,
1,8 л пурыман «VINZOR» электрочайник Алевтина Егоровалан (Морко район Кугу Маршан ял) логалын, «FRESCO» шулыктарыме кофе – Василий Вараксинлан (Параньга район Памашъял), плед – Геннадий Алексеевлан (Шернур район Эҥермучаш ял), ковыштам шинчалтыме пу вочко — Геннадий Небогатиковлан (У Торъял район Токтарсола ял), 25 кг нелытан 1 мешак сакырложаш – Лидия Алексеевалан (Марий Турек район Павайнур ял), фитнес-кидшол – Андрей Копаевлан (Шернур район Нурсола ял), светодиодный понар – Нина Курочкиналан (Марий Турек район Аимке ял), кӱвар виса – С.Казанцевлан (Советский район Советский посёлко), стакан набор – Юрий Красновлан (Морко район Кӱчыкэҥер села), «SMILE» йошкар лампан массажёр – Надежда Васеевалан (Шернур район Лоскутово ял), термос – Надежда Петуховалан (У Торъял район Элеволко ял), ланч-бокс – Эльвира Березиналан (Кужэҥер район Визымйыр ял), C.Шанчаран «Марийцы на просторах России» очерк шотан книгаже – Елизавета Пайгельдиналан (Параньга район, Олор ял), шӱртӧ кӱпшан кугу шӱргӱштыш – Геннадий Ласточкинлан (Морко район Кесемлак села), Кужэҥер районысо Визым кундемыште амалкалче Иван Антоновын базыштыже кок еҥлан мончаште ныл шагат каналташ ӱжмаш – Владимир Беловлан (Морко район Нурӱмбал ял), 3 л мӱй – Елизавета Автономовалан (Параньга район Элпанур ял), «Марий Эл» логотипан кок чайгорка – Иван Егошинлан (У Торъял район Човыксола ял), пластмасс ведра – Роза Булыгиналан (Советский район Шуймучаш ял), пырдыж шагат – Александра Ефимовалан (Медведево район Пиясир села), номер дене сӱретлышаш радына – Владимир Николаевлан (Морко район Кокласола ял), контейнер набор – Алевтина Рыбаковалан (У Торъял район, Кугу Кемсола ял), ӱдырамаш халат – Галина Андреевалан (Морко район Шлань ял), вакшыш шартыш – Илья Платуновлан (Марий Турек район Шӱргынур ял), «Барьер» вӱдлан фильтр – А.Николаевалан (Звенигово район Мочалище посёлко), 2021 ийлан «Идалык пагыт» кугу календарь – Зоя Сергеевалан (Морко район Мызэҥер ял), 2021 ийлан изи календарь – Николай Савиновлан (Морко район Йошкарэҥер ял), шытыктарыме шыдаҥ пырче гыч ямдылыме лапчык (3 пакет) – Роберт Князевлан (Параньга район Параньга посёлко), Валентин Малининлан (Параньга район Кугу Пумарий села), Лидия Фёдоровалан (Параньга район Усола ял), смартфонлан портативный аккумулятор – Александр Кузнецовлан (Кужэҥер район Йырмарий ял), книга комплект (5 книга) – Алефтина Смирновалан (Морко район Кугу Маршан ял), Л.Эскаевалан (Советский район Кукмарий ял), Юля Максимовалан (Морко район Курыкйымал ял), Йошкар-Оласе Тӱвыра да каныме рӱдӧ паркыште верланыше «Ончымо орава» аттракционыш 2 билет – Римма Калугиналан (Параньга район Памашъял), «Марий Эл» газетын 2021 ий кокымшо пелийжылан электрон подписке – Александр Чендемеровлан (Приморско-Ахтарск ола), «Марий Эл» газетын 2021 ий кокымшо пелийжылан альтернативный подписке – Никандр Поповлан (Йошкар-Ола).
Газет редакций кажне лотерей модылтмашлан суперпризым ямдыла. Тений тиде – «Чудесница» кочкышым писын шолтышо каструль. Тудо Шернур районысо Чылдемыр ялыште илыше Анна Милютиналан логалын!
Призым модын налше чыла йолташнам шокшын саламлена да газетна-влак дене кылым ончыкыжат кучаш тӱҥалыда манын ӱшанен кодына. Призлан тарванымыда деч ончыч редакцийышкына 8 (8362) 49-55-11 номеран телефон дене йыҥгырташ йодына.
Маргарита ИВАНОВА
