Йошкар-Олаште шке жапыштыже Богородице-Сергиевый ӱдырамаш монастырь лийын. 2007 ийыште тудын олмышто Входоиерусалим черкым нӧлташ тӱҥалме нерген возенна ыле. Тачысе кечылан тудын оралтыжым нӧлтымӧ, окнам, омсам шындыме, но моло паша шукталтын огыл…
Теҥгече тушко Марий Эл вуйлатыше миен коштын. Ты объектше тӱвыра, савыктыш да калык паша шотышто министерствын балансыштыже улеш, сандене тудым нӧлташ кучылтмо шийвундыжат — тӱрыс республикысе бюждет гыч. Ола покшелне верланыше объектым ынде 14 ий жапыште чоҥен шуктен огыт керт.
А тидлан вӱдым, шокшым пуртыман, вентиляцийым, оролымо, пожарный сигнализаций-влакым да тулеч молым келыштарыман. Чыла пашам регион вуйлатыше лишыл жапыште шукташ кӱштен. Эшежым монастырь комплекс пелен кок пачашан аварийный пӧрт верланен. Тудымат А.Евстифеев «Граждан-влакым аварийный илыме фонд гыч кусарымаш» республиканский адресный программыш пуртымо йодышым ончалаш кӱштен.
Марий Эл вуйлатышын Организаций да аналитике виктемыжын уверже негызеш С.Носова ямдылен.
