Тӱнямбалне шучко чер шарлыме шотышто Кужэҥер район гыч онаеҥ Вячеслав Актугановын ойжо:
« Тӱрлӧ йылман тӱрлӧ калыкын шке кугу Юмышт уло. Шкендан Юмо деке мелын лийза, шотлыза, аклыза, кумалза Юмыдам.
Марий калыкын эн виян кугу юмыжлан Ош Сандалык Тӱҥ Юмо шотлалтеш. Тудо чыла юмыжымат виктара. Тӱня юмын кидыштыже, ӱнарыштыже — Кава Юмын, тыгак Тылзе, Шӱдыр, Мардеж, Пыл, Волгенче, Кӱдырчӧ юмо-влакын, Вӱд Аван, Вӱд Суксын Юмышт вийышт. Ош Кече Ава Кугу Юмым сӧрвален йодына гын, чыла вийжат, ӱнаржат толын шогаш тӱҥалыт.
Ош шемер марий калыкем, тендан деке Мер Юмо мелын лийын шога, чыла вере аралаш тырша. Мланде Ава, Мланде Кугу Юмо, шке вийже дене тӱрлӧ перкем виктарен шогаш тырша. Шочын Ава Кугу Юмо тазалыкым пуаш, чер деч аралаш тырша. Кугу Пӱрышӧ шочаш, илыш тукымым ончыко шуяш тырша. Ме Юмын велыш лийына гын, нимогай чержат, нимогай осалжат ок сеҥе. Ме марий калык верч веле огыл, вес йылман калыкланат мелын лийын кумалын шогена. Тиде осал шучко черым кумалме, пелештыме дене сеҥен кертына. Алал лийже».
Поро Ош Кугу Юмо, Пӱрышӧ, Шочынава, аралыза ешем, родо-тукымем, пошкудем, марий калыкнам, воктене илыше калык-шамычым, элнам, уло тӱням осал чер деч! Ош тӱняшке шочаш пӱралтын гын, илыш курымнам яндар уш-акыл, ару кап-кыл, таза шӱм-мокш, лывырге кид-йол дене илен эртараш лийже!
