СОЦИАЛ ИЛЫШ ТАЗАЛЫК

«Чапшым шӱкташ она пу!»

Звенигово районысо рӱдӧ эмлымверын тӱҥ врачше Олег Романенком Провой вел калык Интернетысе тӱрлӧ социальный сетьлаште должностьыш шогалмыж почешак вурсаш тӱҥалын: пуйто тудын кумылжо почеш Красногорский посёлкысо эмлымверыште лабораторийым, терапий отделенийым петыраш, пашаеҥ-влакым утыктараш шонат, райрӱдысӧ йоча отделенийым инфекций отделенийын полатышкыже кусарыме, сайын олмыктымо тӱлыман отделенийыште тӱҥ шотышто Казань гыч толшо пенсионер-влак эмлалтыт, тидлан кӧра районышто илыше-влак тушко логалын огыт керт… Тыгай сынан вуйшиймаш почеш регионысо Тазалыкым аралыме министерствын еҥже-влак палемдыме медицине тӧнежын администрацийже, верысе кучем дене пырля калык дене ик гана веле огыл вашлийыныт да лекше йодыш-влакым лончыленыт. Но эмлымвер нерген лекше манеш-манеш кузе лектын, тугак коштеш, тушко эше весе ешаралтеш… Чыла тидым шотыш налын, медицине тӧнежын пашаеҥже-влак Марий Эл Республикым вуйлатыше Александр Евстифеевлан серышым возеныт. Врач, фельдшер, медсестра, лаборант, санитарке-влак да технический персонал – чылаже 67 еҥ, тӱҥ врачын чапшым аралаш шогалыныт.

«2018 ий апрель гыч эмлымверын тӱҥ врачшылан моткоч тале вуйлатыше Олег Михайлович Романенко ышта, – ойлалтеш серышыште. – Тиде жаплан медицине тӧнежын 31 миллион теҥге кугыт парымже ыле, но вуйлатыше тудын деч ыш лӱд. Олег Михайловичын реорганизацийым моштен ыштымыж дене районысо калык медицине полыш да услуго-влак дене утларак пайдаланаш тӱҥале, молан манаш гын специалист-влак посёлкылашке, селалашке, яллашке кече еда лектыт, пациент-влакым ФАП ден врач амбулаторийлаште тергат да эмлат. Поликлиникыште черет, а тудын дене пырля врач деке логалме жапат палынак кӱчыкемыныт. Кодшо ий гыч Звенигово олаште да Красногорский посёлкышто верланыше эмлымвер-влакым олмыктат. Медицине тӧнежыш тергыме да лабораторийыште диагнозым шындыме у йӧн-влак шыҥдаралтыт. Коллективыш самырык врач-влак ушнат, тыгак специалист-шамычым у йӧнлан туныктымо пашам ворандарыме.

Тылеч посна ӱмаште Марий Эл Республикым вуйлатыше Александр Евстифеевын полшымыж дене Звенигово районысо рӱдӧ эмлымвер кызытсе жаплан келшыше чапле оборудований дене пойдаралтын. Тыге, кодшо ийын кокымшо ден кумшо кварталлаштыже маммографым, гистероскопым, кислородын 13 концентратшым, операцийым ыштыме кызытсе жаплан келшыше ӱстембалым, 28 пульсоксиметрым, вӱргорно давленийым сутка мучко мониторироватлыше 4 «БиПиЛАБ» регистраторым, ЭКГ-м сутка мучко мониторироватлыше 2 «Кардио-Астел» регистраторым, 12 каналан 4 электрокардиографым, эндоскопий стойкылан операцийым ыштыме кугу наборым, шӱлалтен лукмо южышто этанолын паржым аклыше 2 анализаторым, у лабораторий оборудованийым, цифровой рентген аппаратым, стоматологийыште диагнозым шындаш полшышо 2 рентген аппаратым, стоматологийыште пайдаланыме ӱзгаран 2 радиовизиографым, инфекций отделенийлан физиоаппаратурым да молымат налме.

Техникын, манмыла, пытартыш мутшо почеш шыҥдарыме эмлымвер нерген пошкудо регионлаштат пален налыныт, да калык тышке виян оборудований полшымо дене тергалташ, кызытсе жаплан келшыше эмлыме йӧн дене пайдаланаш толаш тӱҥалын. Тидыже медицине тӧнежын финанс состоянийжым палынак саемдаш полша. Тыге, 2017 ийысе дене таҥастарымаште врач-влакын пашадарышт кокла шот дене 75 процент нарылан кӱзен да 59 тӱжем теҥге лийын, кокла персоналын пашадарже кокла шот дене 29 процент нарылан кӱзен да 23 тӱжем теҥге лийын».

Тыштыже медик-влакым мокталтыде огеш лий: нуно ыштен налме оксаштым айда-йӧра огыт кучылт, а пашадарым кӱзыктымӧ деч посна эше эмлымверлам олмыкташ, у оборудованийым налаш, спорт да тӱшкан веселитлыме, каныме мероприятий-влакым эртараш ойырат. Таче кечылан Звенигово районысо рӱдӧ эмлымверын парымже 8 миллион теҥге марте иземын!

Тӱжвач ончалмаште чыла сайла, илыш воранымыла чучеш, но уке!.. Ала весын сеҥымашыже чоным шыгыремда, ала вес амал… Провой вел медик-влакын возымышт гыч Интернетысе социальный сетьлаште «эмлымвер йырысе теме дене пеш кугу каҥашымаш кая». Тушто южо автор тӱҥ врач О.Романенкон суапше шотышто кокытеланымашым лукташ тырша.

«Звенигово районысо рӱдӧ эмлымверын тӱҥ врачше О.М.Романенкон чапшым нигӧланат шӱкташ она пу, – возат медицине тӧнежын пашаеҥже-влак А.Евстифеевлан. – Тидым чыланат, чумыр коллектив, кидпалына дене пеҥгыдемдена. Ме Тендан дене эмлымверыште кеч-кунамат вашлияш ямде улына».

Серыш серыш дене, но калыкын вуйшиймашыжымат шотыш налде ок лий – ала тудо чынжымак яра вер гыч ок лек. Звенигово районышто илыше-влакын шонымашышт, рӱдӧ эмлымверын пашаж нерген газетыштына лийме семын возаш тӱҥалына. Ала тунам чыным муына?

М.ИВАНОВА

Снимкылаште: Звенигово районысо рӱдӧ эмлымверын тӱҥ врачше О.Романенко;

у оборудований

Фотом Марий Эл Республикын Тазалыкым аралыме министерствыж гыч налме

Опубликовать в Одноклассники

Добавить комментарий