Юлсер кундемын туныктышо-ветеранже, «Марий Эл» газетын чолга селькор йолташыже
Анатолий Александрович САПАЕВЫН
ӱмыржӧ вучыдымын кӱрылтын. Тудо 67 ийыш тошкалын ыле.
Ӱмыржӧ мучко тудо Волжский районысо школлаште – Ярамарийыште, Руш Шайраште, Нурмучаш Шайраште, Сотнурышто — пашам ыштен. Марий йылме ден литературым, ИКН-ым туныктен, ешартыш шинчымашым пуэн – юнкор кружокым вӱден, йоча-влакым сылнымут пашалан кумылаҥден. Возаш веле огыл, сылнымут лудмашке ушнаш таратен шоген. Валентин Колумбым лудмашке шуко гана йоча-влакым вӱден конден, сеҥыше радамыш лекташышт полшен. Шкежат тушто ик гана веле огыл лудшо семын вийжым терген, ик гана веле огыл ойыртемалтын.
А юнкоржо-влак «Ямде лий» ден «Кугарня» веле огыл, «Марий Эл» газетышкат возен шогеныт. Шкежат мемнан дене пеҥгыде кылым кучен – школлаште шуктен шогымо пашаж нерген серен, газетнам шаркалымаште кугун полшен, редакцийыш чӱчкыдын толеден. Санденак ме тудым поро йолташ семын акленна.
Анатолий Александрович, пенсийыш лекмекыжат, школ паша деч кораҥын огыл, кужу жап полшен шоген. Сотнур черке пелен рушарня школышкат йоча-влакым савырен, чонышкышт порылыкым шыҥдарен. Чыла тиде поро пашак тудын нерген поро шарнымашым мемнан чонешна коден.
«Марий Эл» газетын пашаче ешыже
