Тыгай лӱман кугу проектыш Йошкар-Ола икымше гана ушнен.
Тудым кум ий ончыч Россий культур министерствын полшымыж дене Никита Михалковын кинематографий да театр искусство академийже шонен луктын.
Ты проект чапланыше руш классик Антон Чеховын шочмыжлан 160 да Иван Бунинын шочмыжлан 150 ий теммылан пӧлеклалтын.
Фестиваль Нижний Новгородышто, Чебоксарыште эртен, а 6 октябрьыште тудо М.Шкетан лӱмеш Марий национальный драме театрыште лийын.
Кечывал деч ончыч Н.Михалковын академийжын преподавательже, актёр Дмитрий Кошмин Йошкар-Оласе театр-влакын артистше, И.С.Палантай лӱмеш тӱвыра да сымыктыш колледжын театр пӧлкан студентше-влаклан мастер-классым эртарен. Тиддеч вара А.Чеховын илыш корныж ден творчествыж нерген лекций пайдалын эртен. А кастене театрын воштончышан фойештыже Чеховын илыш корныж нерген кумданрак «Чехов. Линия жизни» выставке гоч пален налаш йӧн лийын. Выставкыште писательын тӱрлӧ фотокартычкыже, документше, вургемже ден мӧҥгысӧ икмыняр арверже лийыныт. Нунын кокла гыч Чеховын сумкажым ужаш оҥай лийын. Тудо лач тиде сумкаж дене яллашке черле-влак деке лектын коштын.
Фестиваль деч вара ик эн ушеш кодшо семын поро кумылым ончыктышо «Метаморфозы V. Мадрид» спектакльым шотлыман. Ты гана залыште утларакше врач, социальный пашаеҥ, волонтёр-влак лийыныт. Лач нуно коронавирус инфекций шарлыме жапыште пашам поснак тыршен ыштат.
– Тиде куштылго огыл жапыште Никита Сергеевич Михалковын проектше полшымо дене тӱрлӧ олаш лектын коштына да врач-влаклан тыршен ыштыме пашаштлан таум ойлена. Ме калыкым эмлен огына мошто, а тыге кеч изиш гынат нунын чоныш куаным пуртена, — каласыш спектакль деч ончыч Н.С.Михалковын академийжын проректоржо Алексей Литвинов.
А спектакль чынже денак ик жаплан ойго нерген мондаш полшыш. Кӱчык ойлымаш-влак почеш шындыме постановкышто артист-влакын мастарын модмышт, пластикышт, икманаш, профессионал улмышт чотак палдырныш. Спектакль у формат дене чоҥалтын: Н.Михалковын студент-влак дене репетицийым эртарымыжым ужын кертынна. Сценымат моткоч оҥайын сӧрастарыме ыле. Тидлан 3D декорацийым да видеозарисовко-влакым кучылтмо.
Йошкар-Ола деч вара фестиваль Озаҥыш куснен.
А.БАЙКОВА
Авторын фотожо
