УВЕР ЙОГЫН

Форум: Икте-весын пашашт дене палыме лийыныт

14 февральыште Сочиште Российысе инвестиций форум почылтын. Тудын пашашкыже Марий Эл вуйлатыше Александр Евстифееват ушнен. 

Форумышто Россий Федераций правительстве председатель Дмитрий  Медведев, законодательный да исполнительный кучем гыч еҥ-влак, губернатор-шамыч, вияҥмаш институтла, финанс организацийла, Российысе да йот элласе бизнесъеҥ-влак лийыныт.

Российысе инвестиций форумын тӱҥ темыже тений «Ончыкылык образым ыштышыла» маналтын. Программыште теме шот дене кум блок палемдалтын. Тиде — «У региональный политике: вуйлатымашым саемдышыла», «Регионлаште бизнес. У шӱлышым пурташ», «Илышын качествыжым саемдышыла».

Марий Эл вуйлатыше Александр Евстифеев социально-экономически вияҥмашын эн сай практикыже-влаклан пӧлеклалтше дискуссийлашке ушнен.

Форумым эртарыше-влакын палемдымышт почеш, 14 февраль Самырык-влакын предпринимательстве кечышт дене тӱҥалын. Эрлашыжым «Регионлашке инвестиций – ончыкылыкыш инвестиций» пленарный заседаний лийын. Тудын пашашкыже Дмитрий Медведев ушнен. Правительстве председатель «Сырьевой огыл экспортым вияҥдымаш: задаче ден  инструмент-влак» теме дене вашлиймашым эртарен да ик «йыргешке ӱстел» йыр мутланымаште лийын.

Ты кечынак НКО лабораторийым почыныт. «Росконгресс» фондын площадкылаштыже поро пашам ыштыше фонд ден коммерческий огыл  организаций-шамыч социальный проект-влак секторым вияҥдыме дене кылдалтше программыштлан презентацийым, мероприятийым эртареныт, лекцийым лудыныт.

16 февральыште правительстве председатель Россий Федерацийын субъект вуйлатышыже-влак дене вашлиеш.

Тиде форум деч вара кугыжаныш-влакын лидерышт, тӱрлӧ элын  министерстве ден ведомство вуйлатышышт, бизнесъеҥ-влак 24-26 майыште Санкт-Петербургыш чумыргат. Тушто Петербургысо тӱнямбал экономический форум лиеш. 6-7 сентябрьыште Владивостокышто Эрвел экономический форум, 3-6 октябрьыште Москваште Российысе энергетический арня эртат.

Л.Камалетдинова.

Опубликовать в Одноклассники

Добавить комментарий