Коронавирус инфекций шарлен кертме жапыштат «Культур» нацпроект дене келшышын, тӱрлӧ паша шукталтеш, увертара республикын Тӱвыра, савыктыш да калык паша шотышто министерствыжын пресс-службыжо.
12 майыште йоча сымыктыш школлаште «Фортепиано» специализаций дене тунемше-влаклан М.И.Ключников-Палантай лӱмеш конкурс дистанционно эртен. Тушко республикысе йоча сымыктыш да музыкальный 13 школ гыч 60 йоча ушнен. Волжск ола, Медведево, Юбилейный посёлкыла, Йошкар-Оласе 2-шо №-ан да «Лира» школлаште тунемше-влак поснак чолгалыкым ончыктеныт.
Конкурсышто чылаже 19 участник лауреат лӱм дене палемдалтын, а Волжск ола гыч самырык пианистке Мария Кузнецова (преподавательже – Нина Шорникова) гран-прим сеҥен налын.
А.БАЙКОВА
