16 июньышто Чарла кремльыште «Пеледыш Fest: канышын чыла чияже» туризм да каныш фестиваль эртыме нерген возенна ыле. Тидын шотыштак ешартыш увертарымаш лиеш.
Тушко толшо-влак фестивальын участникше-влакын ямдылыме кочкышыштым авызлен кертыт. Марий, руш, тыгак Европысо моло калыкын кочкышышт лийыт. А йоча-влаклан гын мороженыйымат пуэдат.
Тыгак тӱрлӧ мастер-класс, творческий студий-влак пашам ышташ, экскурсийым, конкурсым эртараш, экосатум ужалаш тӱҥалыт. Кече мучко тӱрлӧ пӧлекым модын налаш йӧн лиеш: мутлан, велосипедым, йоча лагерьыш, тазалыкым пеҥгыдемдыме комплексыш, каныш кечым эртараш икмыняр путевкым. Сандене фестивальым эртарыше-влак тендам кажныжым уло ешге вучат.
С.Носова.
