Марий Эл гыч кум проект Руш православный черкын тенийлан увертарыме «Православный иниициативе-влак» конкурсышто сеҥышыш лектын.
Нуным илышыш шыҥдарышашлан проектым ямдылыше-влак конкурсын организаторжо-влак деч окса полышым налыт. Икымшыже — Марий кугыжаныш университет. «Православный корнышто поро паша дене» маналтше проектышт самырык-влакым духовно-нравственный шӱлышеш шуарымашке виктаралтын. Православный вич экскурсий маршрутым ямдылаш да посна 30 наре web-квест дискым лукташ палемденыт.
Сеҥышыш лекше вес проектым Марий Турек посёлкысо Святой апостол-влак Петр ден Павлын храмыштышт ыштыше-влак ямдыленыт. Черке пелен тений «Кугу державын икшывыже-влак» духовно-патриотический клуб почылтшаш. Тудо шуко шочшан, тӱнен илыше ешла гыч икшыве-влакым чумырышаш. Сарын ветеранже-влак дене вашлиймашым, палаткылаште илыман лагерьым эртараш, воинский частьлаш лектын кошташ да ятр моло меоприятийым ворандараш палемденыт.
«Доброе зернышки» кумшо проектым Йошкар-Олан да Марий епархийже темлен. Тазалык шотышто ойыртемалтше икшыве-шамычлан поро кумылым ончыктымо йоча реабилитационный рӱдерым ышташ палемдыме. Рӱдер пелен врач-невролог пашам ышташ тӱҥалеш. Ешартыш медицине оборудованийым, тренажерым, моло кӱлеш арверым налшаш улыт. Дивеевыш паломник семын экскурсийыш каяш, моло сай пашамат палемденыт.
Тиде кум проектым 20 апрель гыч илышыш шыҥдараш тӱҥалыт да 2018 тӱҥалтыште мучашлат. Палемден кодыман, ты конкурсышто Россий мучко 267 проект сеҥышыш лектын. Чылаже 797 йодмаш пурен улмаш. Грант фондын кугытшо 115 миллион теҥгеш шуын.
С.Носова
