30 мартыште В.М.Васильев лӱмеш Йылмым, сылнымутым да историйым шымлыше марий институтышто Морко кундемын шочшыжо-влак ятырын чумыргеныт. Амалжат моткоч кугу лийын — ты кечын тушто «Ӱжаран Унчо велне» книган презентацийже лийын.
Тудым шукерте огыл Унчо ял шотан илем администраций вуйлатыше Иван Евсеев савыктен луктын.
У книгаште тиде кундемыш пурышо Унчо, Шлань, Шӱргӧ, Паймыр, Ямбатыр, Шап Унчо, Муканай ял-влак нерген веле огыл, тушто илыше да чолгалыкым ончыктышо, пашаштышт кугу сеҥымашке шушо еҥ-влак, верысе озанлык да тудын пашаже, калыкнан йӱлаже да тӱвыраже, Пӱртӱс Юмылан ӱшанымыже да моло нергенат лудаш лиеш.
Вашлиймаш Унчо кундемын гимнже дене почылто. Тиддеч вара МарНИИЯЛИ вуйлатыше, Йошкар-Оласе Морко калыкын вашполыш ушемжын председательже Евгений Петров, Марий Эл Республикысе Кугыжаныш Погын председательын алмаштышыже Анатолий Иванов, тӱвыра, печать да калык-влакын пашашт шотышто министрын алмаштышыже Михаил Матвеев да Морко район администраций вуйлатыше Александр Иванов Иван Михайловичлан историеш кодшо кугу пашам ыштымыжлан тауштеныт да ончыкыжымат тиде книгам ешарен возаш тыланышт.
Унчо кундемыште кӧ гына лийын огыл да кушеч гына толын огытыл!? Теве жапше годым тушко Марий Эл тӱвыран сулло пашаеҥже, писатель В.Осипов-Ярчат миен да икмыняр почеламутым возен. Нине сылнымут корнылам лудын, тудо уэш Унчо кундемыш пӧртыльӧ да залыште улшо-влакымат тушко «наҥгайыш».
Вашлиймаш моткоч поро шӱлыш дене эртыш. А Медведево район гыч мийыше «Кугезе муро» ансамбль сылне семӱзгар сем да муро дене кумылым нӧлтыш.
Икманаш, презентацийыш мийыше кажне еҥ книга нерген сай шомакым ойлен, вет тудым савыкташ шуко материалым погыман, архивыште, тӱрлӧ книгагудышто жапым эртарыман, адакшым еҥ-влакын ойлымыштланат эҥертыман. А Иван Михайлович гай еҥже шукырак лиеш гын, кушкын толшо тукымат шке кундемжым да тудын историйжым сайын палаш тӱҥалеш.
А.Байкова.
М.Скобелевын фотожо.
