У книга
«Юмынӱдыр огеш пу вашмутым»
Тыге маналтеш Марий Эл культурын сулло пашаеҥже, поэт Зоя Дудинан черетан поэзий книгаже. Тудо апрель мучаште савыкталт лекте.
Автор тушко пытартыш индеш ийысе мутсаскажым чумырен. «Мӱндыр торалык» ужашыш Зоя Михайловнан родо-тукымжылан, йолташыже-влаклан пӧлеклалтше почеламут-шамычым пуртымо. Нуно тӱҥ шотышто вес тӱняште улшо коча-коважым, ача-аважым, чӱчӱжым – тукымжым аралыме семын йоҥгат. «Шнуй Петырын олаште» – тыге маналтеш вес ужашыже. Шочмо мланде деч тораште илыме пагытыште чон луштарыше муторлаҥгым тышке чумырен. Поэт мӧҥгӧ, эрык кумыл, мланде пай, «Югорнысо» ю, Сандалык шулык… нерген шонкала. Почеламут корнылаж гоч йолташым, йолташым огыл шонаш тарата. Тӱрлӧ амал дене шочмо кундемым кӧжӧ жаплан, а кӧжӧ эрелан кудалтен кайыше-влакын чон коржмыштым почын пуа.
Книгаш тылеч посна коло ий ончычракак возымо пӱртӱс юмо дене кылдалтше почеламутшо-влакым «Мый тымык отышко толам…» ужашыш пуртен. Тыштак – 2005-2007 ийлаште возымо «Кӱсото» кантатыжын (cемже – Сергей Маковын) текстше. А нылымше ужаш «Олык да курыкмарий-влакын мурышт» маналтеш. Тушко «Марий парк» муро да куштымаш спектакльлан, «Ший Пампалче» мюзикллан возымо почеламутшо-влак пурталтыныт. А теве «Олык да курыкмарий-влакын мурышт» лӱман произведений але нигуштат йоҥгалтын огыл. Тудым Андрей Эшпайын семжылан сылнымут сӱрет семын палемда. Геройжо-влакат оҥай образан улыт – Студент, Аспирант, Меръеҥ, Профессор, Поэт да Мер калык.
Тыге З.Дудина у пашаж гоч лишыл да мӱндыр эл, тӱнясе пуламыр, мер калыкын пӱрымашыже, посна айдемын чон азапше нерген тургыжланымыжым радамла. Калык ойпогысо мутмодыш, ушеш кодшо сылне сӱрет, келге шонымаш тачысе илышын тура йодышыжо-влаклан вашмут семын йоҥга.
С.Пехметова.
