Киров кундем Малмыж район Изи Кетек ялын ӱдыржӧ Мария КУНАЕВА Виче кугыжаныш университетыште нылымше курсыштотунемеш. Тудо тӱҥалтыш классым да англичан йылмым туныкташ ямдылалтеш. Мер илышышкат кумылын ушна. Теве Марий самырык тукымын слётыштыжо ӱдыр ынде кум гана лийын. Икымше гана Параньга район Олор ялыште (2014 ий), вара Оршанке район Кугу Ӧршаште (2016 ий) да тений Шернур район Марисолаште.
– Кызытсе жапыште самырык-влак школыш пашам ышташ огыт кай. Тыйын шонымаште, амалже могай?
– Шукын нелылык деч лӱдыт, очыни. Школышто пашам ышташ куштылгыжак огыл. Шке сомылым йӧратыше, тудлан чон пуэн тыршыше гына сай туныктышо лийын кертеш. А мый изинек туныктышо лияш шоненам, молан манаш гын авамат педагог. Мылам йоча-шамыч дене пашам ышташ келша. Нуным ончен, эре ала-мом уым кычалаш, вияҥаш кумыл лектеш.
– Марий самырык тукым слёт тыланет ала-могай вийым ешара, векат, садланак тый тушко чӱчкыдын ушнет.
– Слётышто мый ятыр йолташым муынам, нуно илышыштем кугу верым налыт. Ме икте-весе дене кылым интернет, телефон дене эре кучена, но вашлийын ужын мутланыме деч шерге нимоат уке. Тыгак тушто лийме мыйым чолгарак лияш, йылмем жаплаш, тӱвырам пагалаш утларак туныктен, патриот шӱлышем куштен, марий йӱла деке мелынрак ыштен.
– Тендан кундемыште марий тӱвырам аралымаште мо ышталтеш?
– Чаманен каласыман, тидын шотышто паша шагал ышталтеш. Марий самырык ӱдыр-рвезе-шамыч шочмо йылмышт дене шагалрак да шагалрак мутланат. Малмыж, Вятские Поляны, Уржум кундемлаште марла эше кутырат, а теве Киров олаште тунемме жапыште марла мутланымым ик ганат колын омыл. Тидыже тургыжландара. Тыге ме йомын, мерчен толына.
Но шочмо кундемыштем марий тӱвыра йомын огыл. Ме кажне ийын Акпатырлан вуйым саваш коштына. Тушко ятыр ӱдыр-рвезе ушна. Икманаш, самырык коклаште калык йӱлам утларак пален налме, тудым ончыкылык тукымлан арален кодаш тыршыме кумыл шижалтеш.
– Тиде ий Волонтёрын идалыкше семын эртен. А доброволец кеч-кунамат поро пашам ышта, таза илыш-йӱлам куча. Тый шкеже еҥлан полыш кидым шуялташ ямде улат?
– Мый дечем полышым йодшо-шамычлан мый эре полшем, тыгак спорт дене кылым кучем. Тений кеҥежым элыштына футбол дене тӱнямбал чемпионат эртен. Мый икмыняр матчым шке шинчам дене ужынам. Саранскыште лийынам. Тушто Панама ден Тунисын модмыштым онченам. А Российын чырык финалышкыже лекмым кугу сеҥымашлан шотлем, кеч варажым нуно сеҥалтыныт гынат. Ӱшанем, футболна у кӱкшытыш нӧлталтеш.
– Шушаш ийыште лудшына-влаклан мом тыланет ыле?
– Тазалыкым, пиалым, икте-весе коклаште ваш умылымашым, келшымашым, тунам вара тӱнямбалне эре тыныс кава лиеш.
Лидия ШАБДАРОВА.
М.Скобелевын фотожо.
