Юл кундем федеральный округышто кызытсе жаплан келшыше перинатальный рӱдер Марий Элыште гына уке.
Регионым вуйлатыше Александр Евстифеевын тыршымыж дене Йошкар-Олаште «Перинатальный рӱдер» кугыжаныш бюджет тӧнежын кӱкшӧ технологиян корпусшым чоҥымо нерген пунчал республикнан илышыштыже кугу событий семын аклалтеш, вет кызытсе рӱдерыште кумдык ситыдымылан кӧра чапле кӱкшытан медицине полышым пуаш неле.
Таче Перинатальный рӱдер 1961-1983 ийлаште чоҥымо ончычсо азам ыштыме пӧртын вич зданийыштыже верланен. Кӱкшӧ технологиян да специализироватлыме медицине полышым чылажымат шотыш налын чоҥымо, кызытсе жаплан келшыше оборудований дене шыҥдарыме корпусышто пуаш палынак йӧнан лиеш.
Чумыржо 5,8 тӱжем квадрат метр кумдыкан кум пачашан у корпусышто азам ыштыме 8 посна палате (тидыже ӱдырамашлан азам пелашыж дене пырля ыштыме практикым илышыш пурташ полша), ӱдырамаш-влаклан 9 койкан интенсивный терапий, кызыт гына шочшо аза-шамычлан 12 кювезан реанимаций да интенсивный терапий, мӱшкыраҥмаш патологий, аза-влакым кокымшо этапыште ончен лукмо отделений-влак лийыт.
Кӱкшӧ технологиян коропусым чоҥымо пашан акшым смете почеш 1 млрд. утла теҥгеш шотлен лукмо. РФ правительствын пунчалже дене пеҥгыдемдыме Кугыжаныш але муниципальный кӱлешлыкшым шукташлан сатун, пашан да услугын закупкышт шотышто мер каҥашымашым эртарыме правил дене келшышын, тиде объект нерген мер каҥашымашым обязательно эртараш кӱлеш.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
