С.Г.Чавайн лӱмеш национальный книгагудышто йот йылме ден сылнымут пӧлка пелен Национальный сылнымут зал почылтын. Залын фондшым Российыште илыше калык-влакын сылнымутышт да нунын историйыштлан, илышыштлан, тӱвыраштлан пӧлеклалтше документ-влак пойдареныт. Чылаже 9000 книгам чумырымо. Нуно Российыште, лишыл да йот эллаште илыше 60 калыкын йылмыж дене возымо улыт. Национальный сылнымут зал почмаште кугу надырым Марий Элыште илыше калык-влакын землячествыштын еҥышт пыштеныт.
Залым почмаште Марий Элын тӱвыра, печать да калык-влакын пашашт шотышто министрын алмаштышыже-влак Г.Ширяева ден А.Луничкин, тӱвыра тӧнежым, регионышто илыше калык-влакын землячествыштым вуйлатыше-влак лийыныт.
Книгагудо директор И.Щеглован палемдымыж почеш, тыгай залым почаш идалык тӱҥалтыште РФ финн-угор калык-влак ассоциацийын президиумжын еҥже-влакын книгагудылан марий, мордва, удмурт, коми, карел литературым да нине калык нерген савыктышым пӧлеклымышт деч вара шонымаш шочын.
Л.ШАБДАРОВА.
М.Скобелевын фотожо.
