САМЫРЫК ТУКЫМ

Тамле кочкыш рецепт – Melnasha лаштыкыште

Тачысе лаштыкын унаже самырык блогер, мурызо Алёна МЕЛЬНИКОВА. Ӱдыр Морко район Курыкйымал ялыште шочын-кушкын. Кокласола лицейым тунем пытарен, кызыт Марий кугыжаныш университетын Калыкле да тӱвыра кокласе коммуникаций институтыштыжо шинчымашым пога. Ончыкылык  тӱҥалтыш класс, марий йылме да литератур туныктышо.

­– Алёна, ты профессийым ойырен налаш мо таратен?

 Йоча-влак дене пашам ышташ келша. Нунын дене вашкылым моткоч вашке муын моштем. Садлан туныктышылан тунем лекташ шоненам. Документламат ик вереак веле пуэнам.

Кеч ончыч кусарыше лийнем ыле, шонымашем вашталтмылан нимыняр ом ӧпкеле.

Йочан йӧратымашыжым да ӱшанжым у методикылан гына эҥертен сулен налаш огеш лий. Тидлан чон гыч лекше куштылго огыл паша кӱлеш.
Тӱҥжӧ – икшывын индивидуальностьшым ужын да аклен моштымаш.

Телым, йоча-влакын дистанционно тунеммышт годым, марий йылме дене туныктышем репетитор лияш темлен. Умбакыжым тиде мылам пайдале лийшаш манын келшышым. Ты пашаште шкем ӱшанлын шижаш тӱҥалмеке, интернетышке резюмем вераҥденам. Тыге у тунемшем-влак лектыныт.

Instagram-ште моткоч сай блогым вӱдет. Йолташет-влаклан кочкышым ышташ рецептлам темлет.

– Тыгай шонымаш ушышкем трукышто толын. Кызыт олаште илем, садланак кажне кечын манме гаяк кочкаш ышташ логалеш. Тудо эре икгай ынже лий манын, тӱрлым ыштылаш тӱҥалынам. Ончыч рецепт-влакым тетрадьыш возен шындынем ыле.  Вара тудым сниматлен, калыклан луктын ончыкташ кумылаҥым.

– Лаштыкетын лӱмжӧ келшен толшо ­ – Melnasha. Тудыжо «мелна» мут дене кылдалтын, очыни?

– Уке. Шукын тыге шонат.  Чынжым гын тудо «Мельняша» семын йоҥга. Ончыч фамилиемын тӱҥалтыш буквалаже, вара – «няша». Тудыжо «наша» мутым ушештара.
­        – ВКонтакте соцкылыште «Йӧратымаш» тӱшкан вуйлатышыже улат. Тудын дене палдаре?

–  2016 ийыште йӧратымаш нерген шуко почеламутым возенам. Садлан, очыни, ушышкем «а молан тӱшкам почаш огыл?» шонымаш толын.

Тудо тӱрлӧ почеламут, кӱчык ушан  шонымаш, илышыште лийше историй, мыскара, калык пале, муро, тӱрлӧ пайдале рецепт-влаклан поян.
Тыгак конкурсым, йодыштмашым ышташ тыршем.

Кызыт тушто  кум тӱжемат пеле утла йолташ уло.

– Блогер тиде профессий але…?

Блогерствым хоббилан шотлем. Кӱлеш сатум ямдылаш, видеош войзаш, тудым тӧрлен, тичмаш роликыш савыраш моткоч шуко жап кая: иктаж кум-ныл шагат.

У рецептым лукташ куатым подписчикем-влак пуат. Тӱрлӧ йодыш лектеш гын, мыланем возат, кочкыш ыштымаште каҥашым йодыт. Тидыже моткоч куандара.

­– Тый тыгак уста мурызо улат. Тиде корнет кушеч тӱҥалын?

– Муро деке йоча годымак шӱмаҥынам. Икымше гана муро дене сценыш шымше классыште «Пампалче» конкурсышто участвоватлымем годым лектынам. «Весенняя капель – 2016», «Зажги себя», «Калейдоскоп», «Радуга над Кокшагой», «Песня в фестивале детского творчества» да моло конкурслаште шке усталыкем тергенам. Кызыт чылажге кандаш мурем уло, тышеч кумытшо рушла.

– Конкурс-влак эре ончылно лияш таратат, тыге?

Чын. Университет пелен тӱрлӧ таҥасымашке кызытат ушнаш тыршем: почеламут лудмашке, тӱрлӧ олимпиадылашке, муро конкурслашке. Кажне меропритий молан гынат туныктен да туныкта. Мыйым гын чулым, ушан лияш, шонымо цельышке шуаш, творческий шӱлышем умбакыжат вияҥдаш кумылаҥддат.

– Тау! Ончыкылык корнет волгыдо лийже.

О.МОШКИНА

Опубликовать в Одноклассники

Добавить комментарий