Йошкар-Олан мэрже Евгений Маслов рӱдоласе уремлаште кудывечылам кузе кучымым терген лектын.
Вуйлатыше Зарубин уремысе 33 ден 35 №-ан, Анников уремысе 2, 4 ден 6-шо №ан пӧртла пелен кудывечылам ончен савырнен. Тидын дене тудо «2017 ийлан кызытсе ола тӱсым ыштымаш» программын илышыш кузе пурталтмыжым терген, паша кузе кайыме дене палыме лийын.
Нине кудывечылаште кызыт бордюрым оптат, тротуар ден корным, автомашинам шогалташ верым ыштат, изи архитектур формым вераҥдаш, спортплощадкылан верым эрыктат.
— Чыла кудывече сылнын койжо манын, тидлан поснак кугу тӱткышым ойырыман, — палемден Е.Маслов. – Теве мом сай велым ончыктыман: тӱзатыме кундемыште илыше-влак шкештат программыш, ты пашаш кумылын ушненыт. Администраций дене вияш кылым ыштеныт, мо шукталтеш гын, чылажат нунын шинчаончылно.
Ушештарена: «2017 ийлан кызытсе ола тӱсым ыштымаш» программыш рӱдоласе 13 кудывече, тыгак «Тазалык аллей» ден Воскресенский набережныйысе сквер пурталтыныт. Пытартышыжым 29 августышто почмо.
Тачысе кечылан кӱшнӧ каласыме уремласе кудывечыла деч посна Первомайский, Л.Толстой, Анциферов уремлаште, тыгак Семёновка селасе Молодежный уремыште пӧртла пелен кумдыкым тӱзатат.
А теве Советский уремысе 121-ше №-ан пӧртыштӧ илыше еҥ кудывечым шке оксаж дене сылнештарен. Тудо олан рӱдӧ кундемыштыже изи оазис семын ончалтеш.
Кудывечым тӱзаташ тӱҥалмыж деч ончыч инвентаризацийым Йошкар-Ола администрацийыште ыштен да чыла йодышым каҥашен, а дизайнер-влак проектым темленыт. Тудын дене келшышын, йолгорныш тыгыдемдыме гранит пудыргым шареныт, Москвасе ден Нижний Новгородысо питомникла гыч кондымо кугу пушеҥге-влакым шынденыт, икгай сынан теҥгыл ден шӱкшакым кышкаш урнылам вераҥденыт.
— Нимолан шылташ, администрацийын планже кугу, но бюджетыште окса ситыдымылан кӧра нуным илышыш пурташ йӧнна шагал. Но Йошкар-Олаште шке олам йӧратыше, тудын сылнылыкше верч азапланыше шуко еҥ-влак илат. Лач нуно шке оксаштым кундемым тӱзатымашке чаманыде пыштат. Тидлан пример семын ты кудывечым ончыктыман. Тудым сылнештарымашке муниципальный бюджет гыч ик ырымат ойырымо огыл, — каласен олан мэрже.
Шке кудывечыштын тӱсшым тыге сылнын вашталтымым тыште илыше-шамычат кӱкшын акленыт да куаныштым огыт шылте.
А.АНДРЕЕВ.
Снимкыште: шке окса кӱшеш сылнештарыме кудывечын ик ужашыже.
