Муниципал образований-влакын общероссийский конгрессышт ден «Лига здоровья нации» общероссийский мер организаций вашкылым да пашам пырля ыштыме нерген соглашенийым подписатленыт.
Документыште кидпалыштым организаций-влакын президентышт – Кугыжаныш Думын депутатше, «Единая Россия» фракций вуйлатышын икымше алмаштышыже Виктор Кидяев ден вӱдышӧ кардиохирург, палыме ученый – А.Н.Бакулев лӱмеш шӱм-вӱргорно хирургий национальный рӱдерын директоржо Лео Бокерия — шынденыт.
Конгресс ден Лига, ойпидыш дене келшышын, ынде иквереш ыштышаш проект-влакым ямдылаш тӱҥалыт.
«Тиде ийым Экологий идалык семын увертарымым шотыш налын, эн ончычак айдемылан яндар да лӱдыкшыдымӧ средам арален кодышашлан келыштаралтше мероприятий-влакым эртараш палемденна, — рашемден Виктор Кидяев.
Марий Эл деч депутат семын коллегыже-влаклан тудо мемнан республикын примерже нерген ойлен.
«Марий Эл Российын экологически ик эн сай да яндар регионжо лийын да тыгаяк кодеш. Тидлан амалым да йӧным тӱкыдымӧ пӱртӱс вер, кучемын политикыже да эколог-влакын пашашт ыштат. Сандене 2016 ийысе иктешлымаш почеш, Экологический лӱдыкшыдымылык департаментын данныйже дене келшышын, республикыште южым, вӱдым да мландым лавыртыме эн изи кугытым палемденыт. Марий Элыште кажне ийын поснак оролымо пӱртӱс кумдык-влак почылтыт. Республикыште гидротехнический сооружений-влакым тӧрлатыме да шотыш кондымо паша сайын ушна. Ӱмаште чылаже 76 тыгай сооруженийым уэмдыме. Тидын годымак нелылыкат вашлиялтеш. Тыгай йодыш дене депутат арня годым республикыште илыше-влак мемнан деке лектыт. Но пашам Марий Эл правительстве дене пырля ыштен, нунын кокла гыч икмыняржым рашемдаш тыршена», — ойлен Виктор Кидяев.
Л.Камалетдинова.
