Марий Элысе ОНФ-ын чолга еҥже ден Курыкмарий районысо Виловат селаште илыше-влакын замечанийыштым шотыш налын, подрядчик Советский уремысе 2-шо №-ан пӧрт кудывечым тӱзатымыж годым ыштыме йоҥылышыжым кок кечыште тӧрлатен: канализаций люк воктенысе кумдыкым бетонироватлен, аварийныйлан шотлымо меҥгым вашталтен.
Регионысо ОНФ-ын специалистше-влак «Йӧнан оласе средам ыштымаш» проект кышкарыште тӱзатыме объект-шамычым терга. Тыгодым пашан качествыжым, ойпидышыште палемдыме жапым шотыш налеш. Ты гана нуно Курыкмарий районышто лийыныт да кучем ден подрядчик-влаклан Виловат селасе кудыкым тӱзатыме дене кылдалтше икмыняр проблемым палемденыт: тергыше-влак Советский уремысе 2-шо №-ан пӧрт кудывечыште коммуникаций люкым асфальт дене петырымым ужыныт, тыгак нунын кокла гыч иктыжын ӱмбалне тошто покрышке киен. Пӧртыштӧ илыше-шамычын мутышт почеш, тидыже тӱзатыме кудывечын тӱжвал тӱсшым локтылеш веле огыл, эше автомобилист-влаклан лӱдыкшым ышта. ОНФ-ын еҥже-влак эше йоча площадкыште шӧрын кайыше электромеҥгым ужыныт – тудын пу негызше чотак шӱйын.
Калык фронтын обращенийже деч вара подрядный организаций чыла тӧрсырым кораҥден.
«Муниципалитетын кучемже замечанийнам шотыш налын да ситыдымашым писын кораҥден. Тыгодымак тиде пӧрт йырысе кумдыкышто моло электромеҥгым кораҥдыме шотышто эше шагал огыл паша кодын. Подрядчикын еҥже-влак йоча площадкыште эше тошто лӱҥгалтыш ден турникым кораҥденыт. Тидым шке семынышт огыл, а администрацийын тошто элемент-влакым кызытсе жаплан келышыше площадке дене вашталташ шонымыж почеш ыштеныт манын ӱшанена», — палемда ОНФ-ын Марий Элысе Оласе средам тӱзатыме мониторинг рӱдержын координаторжо Валентин Севастьянов.
М.ИВАНОВА
