Марий Эл Республикыш йоча-влакым иммунизироватлаш эше 41800 дозо «Совигрипп» вакциным кондымо. Кокымшо да пытартыш тиде партий дене йодмашым тичмашнек шуктымо.
Ача-ава-влак палышаш улыт: икшывын иммунитетше тичмашнек пеҥгыдем шуын огыл, сандене йоча инфекциян шуко тӱрлӧ чер дене черланен кертеш. Вирус шарлыме ик эн тӱҥ амаллан икшыве-шамычын пырля модмыштым, шинчымашым пуымо тӧнежлашке коштмыштым, оҥай мероприятийлаште участвоватлымыштым шотлыман. Пеҥгыдем шудымо нӧргӧ организмлан гриппын вирусшо ваштареш шогаш, пижше черым сеҥаш куштылгыжак огыл, сандене иммунитетым прививкым ыштен формироватлаш кӱлешак.
Прививкым ыштыме деч вара йоча черлана манме шонымаш йоҥылышрак. «Совигрипп» вакцине тазалыклан лӱдыкшыдымӧ да черлан вияҥаш нимогай амалым ок ыште. Тудо иммунитетым пеҥгыдемда, грипп дечын ӱшанлын арала, ситыдымашым ок лук гаяк, молан манаш гын кызытсе технологий дене вакциным сайын эрыктат, уда реакцийдымым ыштат.
Вакцинироватлалтме деч вара йоча шкенжым начарын шижаш тӱҥалын гын, амал прививке дене кылдалтын манаш шотланжак ок тол. Прививкым ыштыме жаплан икшыве ОРЗ, ОРВИ дене ала черланаш гына тӱҥалын улмаш? Сандене прививкым ыштыме деч ончыч йочам врачлан тергыктыман.
Пагалыме ача-ава-шамыч, йочаланда грипп дечын прививкым ыштыме ваштареш ида лий. Шарныза, тендан дене шкендан веле огыл, йочаданат тазалыкда кылдалтын.
М.ИВАНОВА.
