30 сентябрьыште республикыш РФ правительстве председатель Михаил Мишустин толын.
Тудын дене пырля тыгак РФ-н промышленность да торговльо министрже Денис Мантуров, РФ-н финанс министрже Антон Силуанов, РФ-н чоҥымаш да илыме вер ден коммунал озанлык министрже Владимир Якушев лийыныт.
Йошкар-Оласе аэропортышто кугу уна-влакым Марий Эл вуйлатыше Александр Евстифеев вашлийын.
Российын премьер-министрже эн ончычак Йошкар-Оласе шыл комбинатыш миен. Тудо перерабатыватлыше цехым ончен савырнен да предприятийын продукцийже дене палыме лийын. Делегацийым Марий Эл вуйлатыше Александр Евстифеев ужатен коштыктен. РФ правительстве председательым производствышто кучылтмо у технологий, илышыш пуртымо инвестиций проект-влак дене палдареныт.
«ЙОЛА» агрохолдингын генеральный директоржо Рамиль Нигмадзянов премьер-министрлан ыштен лукмо производство кугыт, лукмо продукций да предприятийым вияҥдышаш направлений-влак нерген каласкален.
Михаил Мишустин предприятийын пашажлан сай акым пуэн да агропромышленный комплексыш инвестиций лиеш гын, производствым кумдаҥдаш ямде улмыж шотышто йодын.
Л.КАМАЛЕТДИНОВА
