Марий Эл вуйлатыше Александр Евстифеев Кугыжаныш советын президиумжын Ростов-на-Дону олаште эртыше заседанийыштыже лийын. Тудым Россий Президент Владимир Путин эртарен, палдара Марий Эл Республик вуйлатышын мер кыл да увер управленийже.
Вашлиймашын тӱҥ темыже — элын регионжо-влакын промышленный куатыштым вияҥдыме ончыкылык.
Александр Евстифеевын палемдымыж почеш, Владимир Путин заседанийым Марий Эллан знаковый манме предприятий кумдыкышто эртарен: ӱмаште верысе ялозанлык производитель-влаклан техникым налаш 15 процент марте скидкым пуымо нерген ӱмаште «Ростсельмаш» дене ойпидышым ыштыме.
— Президентын палемдымыж почеш, кодшо ийысе иктешлымаш дене келшышын, экономический вияҥмаш ик процент веле лийын. Сандене 2018 ийыште ик эн ончыч шуктышаш задаче – экономически вияҥме кӱкшытым кугемдымашке шуаш. Ме Марий Элыште комбайным ыштыме дене моктанен огына керт. Тыгодым Марий IT-школ Российыште ик эн виян. Тидым шотыш налын, специалистна-влаклан ӱшанена. Владимир Путин шке ойлымаштыже тыгак экономикын социальный велжылан кугу тӱткышым ойырыш. Меат Марий Элысе предприятийлаште тыршыше-влакын пашадарыштым регионысо кокла пашадар кугыт марте шукташ, сай паша условийым ышташ, лектышым кугемдаш палемдена. Владимир Путин шуко задачым шындыш. Нунын кокла гыч чылажымак шонымо семын писын шуктен огына керт, но корным эртыше сеҥа. Тиде арнянак мый Марий Элын директоржо-влак дене вашлиям. Ончышаш йодыш шуко уло. Ме Президентын палемдыме задачыже-влак гыч тӱҥалына, — каласен Александр Евстифеев.
Россий Президент регион вуйлатыше-влаклан Россий Президент промышленник-шамычын эн кӱлешан йодышыштым писын да жапыштыже рашемдышашлан посна тӱткышым ойыраш темлен. Тиде — мланде участкым ойырымаш да инженерный инфраструктурым ыштымаш, корно сетьым вияҥдымаш, у энергокуат-влакым пашашке колтымаш.
Л.Камалетдинова.
