УВЕР ЙОГЫН

Марий Элыште сонарлыме пагыт 21 апрельыште почылтеш

Тений Марий Элыште пыстылан да ийын коштшо кайыквусым сонарлыме пагыт 21 апрельыште почылтеш да 30 апрельыште петыралтеш. 

Марий Элын Пӱртӱс поянлык, экологий да йырым-йырысе средам аралыме министерствыштыже лач тыге пунчалыныт. Молан манаш гын тений мемнан кундемыште ер ден эҥерла молгунамсе дене таҥастарымаште варарак почылтыт. Вӱдшор пагытат вийым эркын налеш веле.

Мом вара тений шошым сонарлаш лиеш? Кайыклудым, комбым, сузым, кудырым, но узым гына. А теве курмызакым узымат, авамат лиеш, но кастене гына лӱйкалыман. Тыгак музым, сур комбым сонарлаш чарыме.

Тидын дене пырля эше моло чаракат улыт. Мутлан, сонарлаш пий, кучаш полшышо кайык дене кошташ огеш лий. Сонарлаш лекме годым ийын коштшо средствымат кучылташ чарыме. Исключений семын, лӱйымо кайыквусым кычал муаш гына тудын дене пайдаланаш лиеш.

С.Носова.

Опубликовать в Одноклассники

Добавить комментарий