Тачысе унана – мемнан коллегына, «Марий Эл» ГТРК-н увер службыжын специальный корреспондентше Алиса Степанова. Тиде шыма да тыматле койыш-шоктышан, тунамак моткочак чолга да мотор ӱдырамаш, тележурналист, телевӱдышын кызытсе илышыж нерген пален налаш лудшына-влаклан оҥай лиеш шонен, Алиса дене мутым вашталтышна.
— Тый телеэкран гыч кужу жаплан йомынат ыле. Ончышо-влак эсогыл йомдаренат шуктеныт. Тиде у ешым чумырымо, икшыве-влак шочмо дене кылдалтын. Нине куанле тат нерген лудшына-влаклан ала радамлынак каласкалет ыле?
— Мый 2012-шо ий август тылзе гыч 2017-ше ий сентябрь марте мӧҥгыштӧ икшыве дене шинченам. 2012-шо ийыште Денис эргым шочын, тений августышто куд ийым тема. 2015-ше ий апрельыште Дима эргым шочын. Вашке кум ияш лиеш. Юля ӱдырем тений майыште 16 ийым тема. Кок эргым кокымшо пелашем деч улыт. Мӧҥгыштӧ яра шинчаш ярсен омыл. Вич ий жапым тӱрыснек ешемлан пӧлекленам. Тиде ӱдырамашлан эн кугу пиал манын шотлем. Ондак мый паша нерген утларак шоненам гын, уэш ешым погымеке, шинчаончалтышем вашталтын. Тиде тӱняште ӱдырамашлан эн ончыч ава да пелаш лийман, очыни. Юля ӱдырем дене илыме годым, тудын ачаж дене ойырлымеке, ятыр ий йокрокын эртен. Еш кӱлын. Эре эргым шочмо нерген шоненам, ешым погымо шуын. А кызыт мый, Юмылан тау, кум икшыван йӧратыме да йӧратыше пелаш, пиалан ава улам. Ӱдырем 14-ше гимназийыште 9-ше классыште тунемеш. 10-шо классыш вончаш шона. Сай отметкылан веле тунемеш. Ешартыш занятийлашке коштеш. Тудо мылам йолташ ӱдырем гай. Икте-весе коклаште нимом шылтымаш уке. Чылажымат каҥашен ыштена. Шонымашна ик ойыш шуеш.
— Кызытсе пелашет дене икте-весыдам пӱрымаш корныда кунам да кушто ваш ыштен?
— Кокымшо пелашем — Валерий Степанов. Тудо Звенигово район гыч. Ушнымыланна тений икымше мартыште куд ий теме. Юмо мылам кокымшо ганат Степанов фамилиян пелашым колтен. Юля ӱдыремын ачажын фамилийжат Степанов лийын. Сандене вашталташат кӱлын огыл.
Пелашем ятыр ий ӧрдыж кундемлаште пашам ыштен коштын. Специальностьшо дене — водолаз-сварщик. Икмыняр ий вӱд йымач газ пучым шупшмо пашам шуктен. Пытартыш кум ий жапыште пеленемак. Еш дене лиймыже шуэш.
— Мемнан, журналист-влакын, паша тугай: южгунамже мӧҥгӧ гыч эрдене эрак лектын кает да йӱдым веле толын пурет. Каныш кечылаштат мероприятий-влак лиедат, командировкышкат коштман. Нормированный огыл пашатым пелашет умыла? Йоча-шамыч авашт деч посна йокрокланат да йомдарат, очыни? Вет нунын дене урокым ыштыман, шотан озавате, ава да пелаш семын кас кочкышымат ямдылыман, тулеч молат.
— Тачысе кечын пелашем – эн кугу эҥертышем. Икшыве-влакым моткоч йӧрата. Йочасадышкат коштыкта. Кӱлеш гын, поликлиникышкат намиен толеш. Юмылан тау, мыйын пашам умыла. Творческий пашаеҥ-влакын паша кечышт, чынжымак, нормированный огыл да южгунам йӱд мартеат шинчаш логалеш, материалым вашке гына эфирыш пуыман. Тыгай годым ӱдырем ден пелашем чыла ыштат: кочкашат шолтат, пӧртымат эрыктат. Ме чылажымат кутырен ыштена. Икте-весе коклаште умылымаш ок лий гын, илаш неле. Юля дене ик ганат урокым ыштен шинчен омыл. Тудо чылажымат шке ыштен тунемеш, ушан ӱдыр манын кертам. А кугурак эргым лудаш туныктышо кружокыш коштеш, футбол секцийланат шӱман. Тиде илышыште чылажымат шуктен илыман. Тунам писе, чулым лият. Илыш туныкта.
Кумданрак — «Марий Эл» газетын
2018 ий 10 апрельыште лекше номерыштыже лудын кертыда.
Любовь Камалетдинова мутланен.
