Республикысе ялозанлык предприятийлаште шошо ага паша эркын дене, но вийым налеш манын ӱшаныме шуэш. Пытартыш кечылаште игече юалгырак гынат, кукшо. Садлан икияшым ӱдымӧ паша шке радамже дене кая. Туге гынат южо кундемыште мланде эше ночко, манмыла чыла вере сӱрет икгай огыл.
Тений 10 майлан тудо тыгай лийын:
Район План почеш икияшым Ӱдымӧ, га
ӱдыман, га
Волжский 5675 370
Курыкмарий 9198 402
Звенигово 5086 114
Килемар 57 0
Кужэҥер 12814 519
Марий Турек 28238 100
Медведево 13636 3327
Морко 5069 75
У Торъял 12476 2828
Оршанке 8871 1571
Параньга 16537 235
Шернур 13229 1401
Советский 12561 883
Юрино 62 0
Йошкар-Ола 147 0
Республик мучко 143656 12885
2017 ийлан 142469 25155
Шошо ага пашан кузе эртымыжым пален налаш кодшо арняште ме Советский районыш миенна. Таче ты кундемыште чылаже лу утла ялозанлык предприятий уло: Ленин лӱмеш, «Родина», «У илыш», Киров лӱмеш колхоз-влак, «Советское молоко» , «КАМ», «МариАгроРесурс», «Земледелец», «Онар», «Смычка» ООО-влак, «Шойбулакский» да «Семёновский» ЗАО-шамыч. Нунын кокла гыч кум озанлыкыште икияш культурым ӱденыт. Тыге «Шойбулакский» ЗАО-што тудым 228 гектарыште вераҥдыме, «У илышыште» – 285 гектарыште, «Родина» ялозанлык предприятийыште – 15 гектарыште.
Ялозанлык пашаеҥ-влакын ойлымышт почеш, ӱмаште шошо ага пашаш апрель кыдалнак лекме гын, тений чынжымак тылзылан почешрак кодмо. Но мландым йӧратыше калык вуйым огеш шупш. Пытартыш жапыште окса шотыштат, пашаеҥ-влак шотыштат нелылык шагал огыл гынат, кызыт эше илен лекташ тӧчышӧ озанлыклаште чылажат ышташ тыршат. Теве «Родина» ялозанлык предприятийынат Лайсола ял шеҥгелсе нурышто шыдаҥым ӱдымӧ паша шке радамже дене каен. Тушто мийымына кечын «Беларус» трактор дене Рудольф Узоров тыршен, а сеялкыште Владимир Кудрявцев пырчын икшырымын мландыш йогымыжым эскерен да тӧрлатыл шоген. Икмыняр йырым пуымеке, нуно пырчым кондышо Денис Лапшинын грузовой автомашинаже велыш савырнышт – сеялкыште пырче пытен, темаш кӱлеш. Тиде пашалан Анатолий Анисимов, Эрик Яспаров вуйын шогат. Да нуно веле огыл, шыдаҥым ӱдымӧ агрегатыш чыланат опташ полшышт…
Мӱндырнак огыл вес трактор дене Вячеслав Лебедев мландым савырен кайыде тырмален, тыгак ты кечын культиватор дене Алексей Волков, Вячеслав Ерофеев, Лев Коротков, Аркадий Лапшин тыршеныт. Чыла нине еҥ кокла гыч Рудольф Викторович Узоров ден Вячеслав Михайлович Лебедев нерген поснак каласен коден ом керт. Нуно коктынат ӱмырышт мучко трактор дене пашам ыштат, сандене кугу опытан специалистлан шотлалтыт.
Ӱдымӧ агрегатыш шыдаҥым ситышын оптымеке, трактор верже гыч тарваныш да умбакыже пашажым шуйыш.
Г.Кожевникова.