Уш дене варашрак кодын вияҥше Савино йоча интернат-пӧртын воспитанникше-влак тазалык шотышто экшык улман еҥ-шамычлан эртаралтше «Шошо таган-2018» («Весенняя подкова-2018») имне ӱмбалне кудалыштме фестивальыште ик эн сай результатым ончыктеныт: кок икымше, кок кокымшо, ик кумшо да индеш нылымше верым налыныт.
Фестиваль кокымшо гана эртаралтын. Тудын цельже – чыла тӱрлӧ инвалид йоча-шамыч коклаште физический культур ден спортым вияҥдаш да шараш.
Новочебоксарск оласе имне-спорт школын манежыштыже Казань, Йошкар-Ола, Ульяновск, Нижний Новгород, Чебоксар да Юл кундем федерал округысо моло ола гыч йоча церебральный паралич, Даунын палыже, йоча аутизм, эҥертыме-тарванылме аппаратысе экшык дене орланыше 7-18 ияш 80 утла ӱдыр-рвезе шинчымаш ден мастарлыкшым ончыктен.
Фестиваль кышкарысе таҥасымаш-влак Тӱнямбалсе специальный олимпийский правил-шамыч почеш эртеныт. Манежыште имнешке-шамыч тыгай тӱшка йоча-влакын вияҥме ойыртемыштым шотыш налын ямдылыме корныш лектыныт. Тыште нуно имньым виктарыме мастарлыкыштым, вӱдышын полшымыж дене тӱрлӧ упражненийым ончыктеныт.
М.ИВАНОВА.
