СПОРТ

Марий Элын чапшым аралат

7 ноябрьыште Ставрополь крайыште армийыш кайышаш рвезе-влак коклаште Россий кӱкшытан спартакиаде стартым налын. Тушто Марий Элын чапшым Волжский район гыч команде арала.

– Командыште чылаже 10 еҥ: Сотнур кыдалаш школ гыч шым рвезе, икте Памар, а кок рвезе Шарача школла гыч улыт. Ты гана элнан тӱрлӧ кундемже гыч эн тале да виян командыжым веле ойыреныт. Тыге ме 23 команде коклаште таче кечылан строевой смотрышто индешымше верым налынна, лӱйылтмаште кудымшо лийынна. Тыгак Кужытыш тӧрштымаште, автоматым рончен погымаште мастарлыкыштым ончыктеныт, но результатше эше пале огыл, – мане Шарача кыдалаш школышто ОБЖ-ым туныктышо В.Иванов.

– Ты военно-патриотический мероприятий 15 ноябрь марте шуйна. Рвезе-влак куржталмаште, турникыште шкем нӧлтымаште, гранатым кышкымаште, 60, 100, 3000 метр кужытыш куржталмаште да моло видлаште вийыштым тергат, – ешарыш Сотнур кыдалаш школышто ОБЖ-ым туныктышо О.Иванов.

Палемдыман, 2020 ийыште Волжский муниципал районын командыже икымше верым налын. Кызыт Ессентукиште Виталий Егорович ден Олег Васильевич лу тунемшылан кугуракышт семын улыт. Нунын тунемшышт-влак Россий кӱкшытан военно-патриотический мероприятийлаште ик гана веле огыл таҥасеныт да сай результатым ончыктеныт.

Вуйлатышыштланат, участник-шамычланат сай результатым тыланена.

Марий Элын чапшым аралат: Иван Александров, Сергей Ашкельдин, Всеволод Дмитриев, Егор Дмитриев, Павел Егоров, Роман Иванов, Алексей Митяков, Максим Михайлов, Станислав Петров, Никита Ямбаев.

Е.ЭШКИНИНА

Опубликовать в Одноклассники

Добавить комментарий