30 май гыч 1 июнь марте Ижевскыште «Театр и дети» фестиваль-конкурс эртен. Тушко Удмуртий, Башкортостан, Татарстан, Марий Эл гыч йоча да самырык-влакын 14 национальный театр коллективышт ушнен.
Кум кече жапыште кум площадкыште — Удмурт кугыжаныш национальный театрыште, Республикысе калык усталык пӧртыштӧ да Воткинск оласе «Юбилейный» культур полатыште — 6 гыч 25 ияш марте 300 утла участник шке шочмо йылмыж дене спектакльым ончыктен.
Марий Элын чапшым «Воштончыш» образцовый музыкально-драматический театр (художественный вуйлатышыже, режиссёржо — Марий Элын калык артистше Светлана Никитина) арален. Ӱдыр-рвезе-влак, жюрилан Валерий Якимовын пьесыж почеш шындыме «Кинда-Кунда» спектакльым ончыктен, лауреат лӱм дене пӧртылыныт. Самырык артист-влакын: Мария Милютинан, Арина Ибраеван — Оной ден Кинда-Кундан рольыштым сайын модмышт жюрилан келшен, кажныже посна диплом дене палемдалтын. Тиддеч посна «Воштончыш» театр марий тӱран костюм-влак денат ойыртемалтын, тидланат посна дипломым налыныт.
А.БАЙКОВА
Фотом театрын архивше гыч налме
