«Театральный Приволжье» фестивальыште сеҥыше-влакым кодшо кечылаште Ижевскыште Удмурт национальный театрын сценыштыже саламленыт.
Тыгодымак йоча да самырык коллектив-влакын конкурс афишыштым ямдылыше-влак коклаште призёрым ойыреныт, увертара республикын тӱвыра, савыктыш да калык паша шотышто министерствыжын пресс-службыжо.
Фестивальыште Медведево посёлкысо тӱвыра да каныме рӱдер пеленысе «Маска» калык театр кокымшо верыш лектын. Тыгак коллективын ончыктымо «У войны не женское лицо» постановкыжым «Шарнымаш да Чап идалыкым почын пуышо эн сай спектакль» номинацийыште палемденыт.
– Участник-влак ий гыч ийыш ешаралтыт. Тидыже мыйым веле огыл куандара. Регионласе школлаште да тунемме моло заведенийлаште театр коллектив-влакат шукырак чумыргат. Те, ӱдыр-рвезе-влак, илышдам театр дене кылдеда да профессиональный артист марте кушкыда гын, моткоч сай лиеш ыле. Но вес профессийым ойырен налыда гынат, фестивальыште мастарлыкым ончыктымыдам ӱмырда мучко шарнаш тӱҥалыда», – палемден Юл кундем федерал округышто Россий президентын полномочный представительже Игорь Комаров.
«Театральный Приволжье» фестиваль – округысо проект. Тудо Юл кундем федерал округышто Россий президентын полномочный представительже Игорь Комаровын темлымыж почеш Российыште Театр идалыкыште (2019 ий) эртаралташ тӱҥалын. Фестивальын 2020-2021 ийысе тургымышкыжо чылаже 416 театр коллектив ушнен.
А.БАЙКОВА
Фотом Тувыра, савыктыш да калык паша
шотышто министерствын сайтше гыч налме.
