Арбитражный суд
Лӱмгечышт дене саламлен
5 июльышто Марий Эл Республикым Вуйлатышын пашажым жаплан шуктышо А.Евстифеев Марий Эл Республикын Арбитраж судышкыжо миен.
Тудо Суд председатель Людмила Рогожина дене вашлийын, судья ден ты аппаратыште тыршыше еҥ-влакым суд-арбитраж системын 25 ияш лӱмгечыж дене саламлен. Людмила Рогожинан каласкалымыж почеш, кызыт республикысе Арбитраж судышто 19 судья пашам ышта. Ӱмаште нуно 16 тӱжем 940 делам онченыт. Кажне судьялан шотлымаште 91 дене логалын.
Александр Евстифеев Марий Эл Республикын Арбитраж судшын ончылныжо шындыме задачым сайын шуктымыжым палемден да ончыкыжат еҥ-влак ден организаций-шамычын праваштым аралымаште ӱшанлын тыршаш тӱҥалмыжлан ӱшанымыж нерген ойлен.
«Те жап дене тӧр ошкылыда, у технологий дене пайдаланен, пашадам пайдалынрак да сайынрак ыштеда. Пайремда сайын эртыже. Мыйын саламлымашем пӱтынь коллективланда ойлыза», — манын Александр Евстифеев.
Е.Садовин.
