С.Г.Чавайн лӱмеш калыкле лудмывер 140 ияш лӱмгечыжым палемден. Тудо Царевококшайск олан изирак лудмыверже гыч тӱҥалын да кызыт регионын тӱвыра да духовный илыш рӱдерышкыже савырнен манашат лиеш. 1200 тӱжем экземпляр савыктышым арала, электрон, аудиовизуальный материал, марла книга-влак ситышын улыт. Кажне ийын 11 тӱжем у савыктыш дене пойдаралтеш. Идалыкыште тушко 300 тӱжем наре еҥ коштеш. Сайтышкыжат пурышо-влак ешаралтыт. Марий Эл Республикым вуйлатыше А.Евстифеев лӱмгече дене саламлаш лӱмын миен ыле.
Тудо С.Г.Чавайн лӱмеш сылнымут кабинетым ончен савырнымеке, тусо пашаеҥ да районласе лудмывер вуйлатыше-влак дене вашлийын. А.Евстифеев палемден: «Лудмыверын историйже — тиде кугу творческий проект-влак да шке пашам йӧратен ыштыше коллектив… Самырык-влак кызыт книга дене ончычсо семын пашам огыт ыште гынат, нуно ты лудмыверыш коштыт. А тусо пашаеҥ-влак кумылыштым савыраш, калыкнан тӱвыра да духовный поянлыкшым арален кодымо верч чот тыршат.
Пайрем годым Марий Эл Правительствын лукмо «Марий Эл-2018» календарьын презентацийже эртен. Тудын дене А.Евстифеев шкежак палдарен. У савыктышыште кажне тылзын лаштыкше келшен толшо марий шӱлышан фотосӱрет дене сӧрастаралтын. Шорыкйол, Ӱярня пайрем-влакым, йытын куэм гыч ямдылыме марий тӱран вургемымат ужына.Тӱрлӧ регионышто илыше марий-влак нерген палдарыше фотосӱрет-влакат улыт.
Республик вуйлатыше пашаште ойыртемалтше-влакымат палемден. Нунын коклаште Курыкмарий кундемын почётан гражданинже, РФ да Марий Эл тӱвыран сулло пашаеҥже, Сарапай тӱвыра пӧртын хормейстерже А.Яйцов лийын. Оҥышкыжо «За заслуги перед Марий Эл» орденын медальжым пижыктыме. Марий Эл Правительствын Чап грамотыжым С.Г.Чавайн лӱмеш калыкле лудмыверын пашаеҥже-влак И.Никитина ден Н.Осокиналан кучыктымо.
С.Носова.
М.Скобелевын фотожо.
