УВЕР ЙОГЫН

Леонид Маркеловлан суд залыш «вашкеполышым» ӱжыктеныт

Марий Элын ончычсо вуйлатышыже Леонид Маркелов шотышто кодшо кечылаште кумшо уголовный делам тарватеныт, палдара ТАСС. 

Взяткым налме, огнестрельный оружийлан патрон-влакым аралыме деч посна тудо ынде тыгак должностной полномочийже дене утыжден пайдаланымылан титаклалтеш.

Маркеловым идалык ончыч, ӱмаште апрель тӱҥалтыште, СИЗО-шко вераҥденыт да ончычсо вуйлатыше кызытат туштак – Москваште, «Лефортово»  следствий изоляторышто – шинча.

4 апрельыште тудын делаже шотышто черетан заседаний лийын. Тушто арест жапым шуйымо нерген йодышым каҥашеныт. Но Леонид Маркеловлан кенета йӧсӧ лийын каен да Мосгорсудын залышкыжак «вашкеполышым» ӱжыктеныт. Икмыняр шагат гыч суд шке пашажым шуен да ончымо йодышышко угыч пӧртылыныт.

— Судебный заседаний жапыште Маркелов шкенжым удан шижаш тӱҥалынат, суд перерывым увертарен да титаклыме еҥлан «вашкеполышым» ӱжыктеныт. Тудыжо кӱлеш медицине полышым тудлан конвой-влакын пӧлемыштышт пуэн. Икмыняр шагат эртымеке, йодышым умбакыже каҥашеныт, — палдарен судын представительже. Тиде уверым ТАСС-лан адвокат Елена Вяткина пеҥгыдемден.

Мосгорсуд следствийын ходатайствыжым шуктен да Леонид Маркелов ден Наталья Кожановам июль кыдал марте арестыште кодаш пунчалын.

«Лефортово» СИЗО-шко Маркелов деке мийымыж деч вара Москван ОНК-жын членже Александр Ионов ТАСС-лан подследственныйын эргыж дене вашлияш чарымыштлан вуйым шиймыж  да федерал значениян «Матросская тишина» СИЗО-шко кусараш йодмыж нерген ойлен. Тыгак  правозащитникын мутшо почеш, ончычсо чиновник кызыт моткочак волышо кумылан да неле психологический состоянийыште. Нине амал дене ОНК-ан членже-влак СИЗО вуйлатыше-влаклан тудлан психологический полышым пуаш темленыт.

Л.Камалетдинова.

Опубликовать в Одноклассники

Добавить комментарий