Национальный драматургий фестиваль «Йыван Кырла. Путёвка в жизнь» спектакль дене почылтеш. Тудым режиссёр Степан Пектеев сценыш луктеш.
— Кызыт репетицийым кажне кечын гаяк эртарена. Тул волгыдым шындена, музыкым келыштарена. Семым Санкт-Петербург гыч композитор Евгений Роднянский ямдыла, художник семын Катерина Андреева тырша, — палдара Степан. — Землякна, поэт, киноактёр Йыван Кырлан илыш корныж нерген документальный спектакльым калык ончыко лукташ – пеш ответственный паша. Тиде теме Марий республиклан, театрлан пеш кӱлешан. Ме Йыван Кырлан веле огыл, тудын дене пырля кодшо курымын 30-шо ийлаште илыше ятыр лӱмлӧ еҥым палышаш улына. Тудо жап элыштына ик эн неле пагыт семын шарналт кодын. Кырла талантан артист улмыж денат ушеш кодын да тӱня мучко чапланен. Сандене «Путёвка в жизнь» кином шедеврлан шотлыман.
Экспериментальный постановкышто чылаже 20 артист модеш. Кырлан образшым чыланат чоҥаш тӱҥалыт.
— Постановкышто ме Кырлан илышыж гыч, тыгак «Путёвка в жизнь» кино гыч ужашым уэмден, сценыш луктына. Тидын пӱрымашыже ойган лийын: 12 ияшыж годым ачажым пуштыныт, — каласкала самырык режиссёр. — Тиде постановкым сценыш лукташ кӱлмӧ шонымаш шукертак лийын. Йыван Кырлан илыш корныж дене палыме лияш манын, архивлаште документ-влакым шымленам, тудын шочмо Шернур кундемышкыжат миен толынна, Марисола тоштерыштат лийынна. Тидлан ятыр еҥ полшен, сандене чылаланат кугу таум ойлем. Тиддеч посна «Путёвка в жизнь» кином пачаш-пачаш онченна. Чыла нине материал негызеш авторский сценарийым возенам. Тудын почеш Шетан театрысе артист-влак дене августышто репетицийым тӱҥалынна. А 14 ноябрьыште постановкын эскизшым ончыктена.
«Марий театр дене кылым пеҥгыдемдынем»
Кырла нерген спектакльым композитор, музыкант, «Grenz» группын солистше Евгений Роднянский сем дене сӧрастара.
— Степан дене идалык ончыч палыме лийынна. Тиддеч вара икмыняр постановкым сценыш лукмаште пырля тыршенна. Варажым тудо Кырла дене кылдалтше постановкыланат семым возаш темлен. Келшенам, — ойла Женя. — Тиддеч ончыч Йыван Кырла нерген шагал паленам. Тиде постановко дене пашам тӱҥалмеке, тудын нерген утларак да утларак пален налмемлан куаненам. Чынжымак, Йыван Кырла – марий калыкын кугешнымашыже, тудо уло тӱнялан тудым чапландарен.
Е.Роднянский марий сем дене пашам ышташ тӱҥалмыж деч ончыч калыкнан тӱвыраже, йӱлаже веле огыл, муро, сем ойыртемже нерген пален налаш манын, шуко лудын, шымлен.
— Але марте национальный театр дене пашам ыштен омыл ыле. Марий Элыште икмыняр йолташем уло. Нунын каласкалымышт гоч шуко нерген паленам, а кызыт тыште икымше гана улам. Чылажымат шке ужаш, мутат уке, эшеат сайрак, — чонжым почеш уна. — Шкетан лӱмеш театр вашке шӱдӧ ияш лӱмгечыжым пайремлаш тӱҥалме нерген пален налмеке, ӧрынамат ыле. Театр коллектив изижак огыл, нуным репетицийыште ужмеке, мастарлыкыштланат куаныман, шке пашаштым сайын палат, талантан улыт, сценыште модмышт чоным тарвата, куандара. Ончыкыжымат Марий театр дене кылым кучаш тӱҥалам да марий калыкым чапландарыше кугу пашам ышташ шонымаш уло.
А.БАЙКОВА.
