5-9 апрельыште республикысе Курчак театрын артистше-влак Калмыкийын рӱдолаштыже уна лийыныт.
Ты кечылаште Элиста олаште тӱнямбал кӱкшытан «Кееда» фестиваль эртен. Тушко Башкортостан, Чуваш республикла, Беларусь да Хакасий гыч самырык театр-влак ушненыт. Мемнан театрна Марий Эл искусствын сулло деятельже Татьяна Батракован шындыме «Крошка Енот» спектакльжым ончыктен.
– Фестивальыш чумыргышо коллектив-влак кокла гыч ме гына курчак дене модшо театр лийынна. Мемнан мийымына шукыштлан вучыдымо пӧлек лийын. Спектакльым ончаш зал тич йоча-влак погыненыт, – куанжым пайлыш Марий Элын калык артистше Эльвира Лисицына. – Калмыкийыште курчак театр ик ий веле пашам ышта. Тушто йоча спектакльым шагал шындат, сандене мемнам, моткоч сайын вашлийыныт, «Браво!» манын тауштен, кужу жап совым кыреныт.
Тусо калык поро кумылан, унам вашлийын мошта, кече гай шыргыжмышт поснак чоным вӱчкен.
Ушештарена, Курчак театр Элиста олаш 2004 ийыште лийын. Тунам тудо «После дождичка» спектакльым ончыктен.
Тора кундем гыч марий артист-влак теҥгече пӧртылыныт. Кызыт нуно уэш корныш лекташ ямдылалтыт. Ты гана «Большие гастроли» программе дене келшышын, Кемерово олаш каят. Тусо калыклан «Айболит», «Бука» да «Колобок» спектакль-влакым ончыктат.
А.БАЙКОВА
