УВЕР ЙОГЫН

Кум пачаш шерге вӱдым йӱыт

Килемар районысо Арда селаште илыше-влак вӱдым пуымо да тудым йоктарен колтымо услугылан акым кӱзыктымӧ амалым тергаш йодыныт.

«Тариф 2018 ийын кокымшо пелыж гыч чот вашталтын. Йӱшаш 1 куб.м вӱд 65,35 теҥге марте кӱзен (идалыкын икымше пелыштыже 27, 82 теҥге лийын), а канализаций – 33,38 гыч 59,54 теҥге марте. Коммунальный услугын акше идалыкыште 207 процентлан кушкын кертеш мо?» – шуко пачеран пӧртыштӧ илыше-влак ӧрыныт.

Килемар районысо Арда ял шотан илемыште палемдыме услугым «Тепловодоканал» МУП пуа. Администраций акым кӱзыктымӧ амалым Марий Эл Республикын Экономически вияҥмаш да торговльо министерствыжын 2017 ий 14 декабрьыште 106т. № дене лукмо кӱштымашыж дене умылтара.

Министерстве калыклан пуымо вашмутыштыжо йӱштӧ вӱдым ситарымылан да тудым йоктарен колтымылан ак чыла районышто тӱрлӧ манын. Тариф кокласе кугу ойыртемын тӱҥ амалжылан услугым пуымо кугыт ден сетьын кужытшым палемден. Килемар районысо калык пуч дене толшо йӱшаш вӱдым шагалрак кучылтеш, икте-весе деч тораште ила, тидлан кӧра сеть моло кундем деч кужурак да тудым обслуживатлаш роскотат шукырак ышталтеш.  

«Ситуаций простажак огыл, но ялысе калыклан тыгай тариф чот кугу. Тидымак шотыш налын, регионысо прокуратур деч полышым йодна. Нарушений нерген ойлымо деч ончыч компетентный орган-влакын тергымыштым вучалтена», – манеш ОНФ-ын регионысо штабшын сопредседательже Руслан Гизатуллин.

М.ИВАНОВА.   

 

Опубликовать в Одноклассники

Добавить комментарий