«Шкалан шке туроператор» икымше путеводитель савыкталтын.
Ты пашам «Мы — региону» региональный социально-просветительский мер организаций Россий Президентын грант фондшын, республикысе Тӱвыра, савыктыш да калык паша шотышто, Молодёжный политике, спорт да туризм министерствыже-влакын полшымышт дене шуктен.
У савыктыш идалык наре чумыралтын. Тудо республик мучко шке гыч корныш тарваныше-влаклан сай эҥертыш лийшаш, молан манаш гын тушко кундемнан сылне верлаж дене, кузе тушко миен шумо маршрут-влак палдарыше справке материал-влакым пуртымо. А чыла тидым иктыш чумыраш манын, чотак тыршаш логалын, поснак верлаште эше пешыжак огыл палыдыме, тиражироватлыдыме объектла нерген пален налаш тӱрлӧ лудмыверыш але тоштерыш, посна еҥ-влак деке лекташ кӱлын.
«Пытартыш жапыште туристический объект-влак дене палдарыше тӱрлӧ буклет савыкталтеш гынат, тыгай энциклопедий справочник семын ямдылыме путеводитель республикыште эше лийын огыл, — ойла проектым вуйлатыше, историй науко кандидат, Россий тӱвыран сулло пашаеҥже Нина Ефимова. — Тудым кидыш налын, кажне еҥ, уто оксам пытарыде ты але вес объект нерген пален налын миен толын кертеш. Эшежым тушко коммерческий маршрут-влакым веле огыл, а республикнан тӱвыраже, историйже, пӱртӱсшӧ дене палдарыше объект-влакым пуртымо. Тидын годым палемдыме верыш кузе писынрак миен шуаш, кушто малаш, кочкаш лиймымат тушечынак рашемден кертеш. Материалым чумырымо годым, республикыштына улшо ятыр ойыртемалтше вер-шӧр дене палыме лийме. Кажне районжак турист объект шуко улмо дене моктанен огеш керт гынат, но улшыжо моткоч ойыртемалтше улыт.
Путеводитель 500 экзепляр дене гына савкыталтын. Тудым республикысе лудмыверлаште да турист рӱдералаште ончалаш лиеш. Электрон версийже С.Г.Чавайн лӱмеш калыкле тоштерын сайтышыже уло.
С.НОСОВА
