Моноола-влакын вияҥдыме фондын пашаеҥже-шамыч Марий Эл гыч делегаций дене вашлийыныт да Козьмодемьянскым вияҥдыме проектым каҥашеныт.
Фондын генеральный директоржо, Внешэкономбанк председательын алмаштышыже Ирина Макиева дене мутланымашке Марий Эл правительстве преседательын икымше амаштышыже Александр Сальников, промышленность, экономике вияҥмаш да торговльо министр Станислав Крылов, финанс министр Алексей Торощин, Козьмодемьянск ола администраций вуйлатыше Михаил Козлов, Марий Эл деч Федераций Советын сенаторжо Константин Косачев ушненыт. Эн ончыч фондын полшымыж дене моноолаште вич предпринимательын проектыштым илышыш шыҥдарыме нерген каҥашеныт. Нуно IT–технологий, медицине да лифтостроительный отрасль-влак дене кылдалтыныт.
Моноолан бизнесшылан вияҥаш фонд тӱрлӧ йӧн дене полшен кертеш. Иктыже — 5 гыч 25 миллион теҥге марте льготан займым идалыкаш 0% дене да 250 миллион теҥге деч 1 миллиард теҥге марте идалыкаш 5 % дене пуымаш. Тидын деч посна фонд регион дене пырля иинфракструктур объект-влакым уэмден олмыкташ 95 % марте финансироватлен кертеш. Тӱҥ условийже — инвестпроект монола кумдыкышто илышыш шыҥдаралтшаш да у паша вер лекшаш.
Тыгак совещанийыште Козьмодемьянсклан окса дене кылдалтше огыл полышым пуымо шотыштат мутланымаш лийын. Мутлан, оласе туризм сферым вияҥдаш полшышо «Прошагай город» проекым илышыш шыҥдарыме нерген.
Каласен кодыман, Козьмодемьянсклан монола статусым пуымылан идалык наре лиеш. Кызыт ола кучемым вуйлатыше команде Сколково Москосо управлений школын базыже негызеш образовательный программым эрта. Тидын деч вара нуно моноолан виянме проектшым ямдылышаш улыт. А тудым илышыш шыҥдараш Моноола-влакым вияҥдыме фонд полшаш тӱҥалеш.
С.НОСОВА
