Маристат регионыштына шочшо да колышо граждан-влакын, регистрироватлыме мужыр-шамычын чотыштым рашемден.
Тыге, январь-сентябрьыште Марий Элыште 4969 аза шочын: 2081 йоча – Йошкар-Ола кундемыште, 362 – Волжск ола кундемыште да 103 – Козьмодемьянск ола кундемыште.
Район-влак коклаште аза шочмо чот дене икымше верыш Медведево район логалын, тиде кундемыште ош тӱняшке 615 йоча толын, кокымшо верыште – Звенигово район (308), кумшышто – Морко район (242).
Тений индеш тылзе жапыште республикыштына 6669 еҥ ош тӱня гыч каен. Тыге, калыкын чотшо 1700 еҥлан иземын. Эн шуко еҥ Юрино районышто колен.
2020 ий январь-сентябрьыште тыгак 1993 мужырым официально регистрироватлыме. Тидыже ӱмашсе тыгаяк пагыт деч 23,8 процентлан шагал. Ойырлымо чотат иземын: индеш тылзыште 1574 еш шаланен — 2019 ий тыгаяк пагыт дене таҥастарымаште 10,4 процентлан шагал.
М.ИВАНОВА
