«Здравоохранений» национальный проектын «Икшыве-шамычлан медицине полышым пуымо кызытсе жаплан келшыше инфраструктурым ыштен, йоча здравоохраненийым вияҥдыме программе» региональный проектше дене келшышын, Марий Элыште 2019-2020 ийлаште 134 млн. утла теҥгеш 86 единице медицине оборудованийым налаш палемдыме.
1 октябрьлан конкурент процедурым эртарыме да 11 единице оборудованийым: рентген компьютер томографым, 12 каналан кок электрокардиографым, рентгенографийлан кок цифровой рентген диагностике аппаратым, кум датчикан кум УЗИ аппаратым, ныл датчикан ик УЗИ аппаратым, йол механотерапийлан аппаратым, пагар-шолора корным шымлашлан йоча фиброскопым – налын шындыме шотышто контрактым ыштыме.
Тымарте кандаш единице медицие оборудованийым шындыме, тидлан 50 млн. наре теҥгем кучылтмо. 19 ноябрь гыч эше кум у оборудований дене пайдаланаш тӱҥалаш палемдыме.
Медицине оборудованийлам налме годым 106 тӱжем теҥгем аныклен кертме. Тиде окса дене Йошкар-Оласе йоча больницылан дефибрилляторым налаш кутырен келшыме.
Проект кышкарыште Йоча республиканский клинический больницыште компьютер томографым шындаш келшыше верым тӱрыснек олмыктымо, тидлан 1,11 млн. теҥгем кучылтмо. Кызыт Волжск оласе рӱдӧ больницыште рентген аппаратым шындаш палемдыме кабинетым олмыктат, тиде пашалан 950 тӱжем теҥгем ойырымо.
Проект дене келшышын, Йошкар-Оласе йоча больницын 4-ше да 5-ше, Волжск оласе, Шернур районысо рӱдӧ больницылан да Козьмодемьянск межрайонный больницын йоча поликлиникыштым олмыкташ палемдыме. Тидлан республикын бюджетше гыч 14,7 млн. теҥгем ойырымо. Октябрь тӱҥалтышлан 11,4 млн. теҥгеаш пашалан контрактым ыштыме.
Тылеч посна Йоча республиканский клинический больницын функциональный диагностике отделенийжым октябрь мучаш марте олмыктен шуктышаш улыт.
М.ИВАНОВА
