УВЕР ЙОГЫН

  Икымше поезд толын…

      Кодшо шуматкечын Йошкар-Олаш Самара ола гыч икымше гана турист поезд толын.

«Российсе кӱртньыгорно-влак» обществе «Юл кундемыште шарнымашан каныш кече-влак» проект кышкарыште тыгай турист поездым икымше гана колтен. Тудын составыштыже СВ категориан комфортабельный вагон ден купе-влак улыт. Нуно кондицонер, биотуалет, розетке дене пойдаралтыныт. Кугыеҥ-влаклан билет 10 900, а 10 ияш марте икшыве-шамычлан 7 700 теҥгем шога. Туге гынат, икымше поездыш 350 еҥ билетым ончылгоч налын.
 Проектын регионысо партнёржо «Шёлковый путь» туроператор лийын. Мом вара тудо уна-шамычлан Йошкар-Олаште ончалаш темлен? Программыште марий рӱдолан моторлыкшым почын пуышо йолын коштмо экскурсий, национальный блюдо-влак темлыман кечывал кочкыш, М.Шкетан лӱмеш театрыште марий калык йӱла, семӱзгар, муро-куштымаш дене палдарыше интерактивный музыкальный шоу эртеныт. Тыгак турист-влак калыкле художественный галерейыште, Чарла кремльыште эртыше ялозанлык, кидпаша  ярмиҥгаште лийыныт. Республикысе Марий тӱвыра рӱдер лӱмын «Шошо пазар» программым ямдылен ыле. Тушто марий калык йӱла, тӱвыра, кочкыш дене районла гыч толшо  куд фольклор коллектив палдарен.

Турист-влакым Йошкар-Оласе кӱртньыгорно вокзалыште Марий Эл правительстве председательын икымше алмаштышыже Михаил Васютин ден молодежный политике, спорт да туризм министр Лидия Батюкова лӱмын вашлияш лектыныт. Поезд гыч волен, унала толшо-влак вигак марла мурышо да куштышо артист-влакым ужыныт, шкештат пырля куштен кертыныт.

Оҥай ыле эскераш нине турисит-шамычым Брюгге эҥер серыште, кунам нуно ӧрын ончен шогеныт Патриарший площадьысе ик оралтыште вераҥдыме Христос дене кылдалтше Евангелийысе сюжетым ушештарыше скульптур композицийын тарванылмыжым. Чылан гаяк  шке телефонышкышт але фотоаппарат дене ты сӱретым шарнаш войзеныт. «Йошкин пырыс» композиций воктенат чылан гаяк войзалтыныт. Экскурсовод-влакын ойлымышт почеш, утларакшым турист-шамычым марий рӱдолаштына Европысо гай оралте-влак улмо ӧрыктарен, тыгак – Москосо Спасский башньым ушештарыше Благовещений башне. Кастене уна-влак, поездыш шинчын, мӧҥгеш  каеныт.

С.Носова

Снимкылаште: Самара гыч толшо турист-влакым вашлийме годым.

 

Опубликовать в Одноклассники

Добавить комментарий