Эртыше кечылаште 22 ияш рвезын банк картше гыч оксам шолыштыныт.
Тидын нерген полицийыш увертарымекше, самырык еҥ умылтарен: ик кевытыште сатум налмылан тӱлымекше, картшым йомдарен. Но тидым вараже эше икмыняр кевытыште налме сатулан чылаже 12 тӱжем утла теҥгем тудын картше дене тӱлымӧ нерген смс-увер-влак толаш тӱҥалмеке гына рашемден.
Тиде факт шотышто уголовный делам тарватыме.
Оперативно-кычалме мероприятий-влакым эртарен, полиций пашаеҥ-влак тидым кӧн ыштымыжым рашемденыт да кученыт. Тиде ончыч судитлыме, кызыт пашадыме 42 ияш ӱдырамаш лийын. Тудак рвезын картшым муын да оксажым шке кӱлешыжлан кучылтын.
Л.КАМАЛЕТДИНОВА
