«МАРИЙ ЭЛ» ТАЧЕ

Ешартыш полышым пуэныт

Федеральный чодыра озанлык агентстве мемнан элысе чодыра паша сайын вияҥме 10 регионышкыжо ешартыш шийвундым колтен. Ты оксаже шеледалтдыме огыл федеральный бюджетысе субвенций резерв гыч ойыралтын.

Россий Федерацийын регион-влаклан пуымо полномочийым шуктымо пашан лектышыжым аклыме рейтинг 2020 ийыште ышталтын улмаш. Полномочийым шуктымо пашам 36 критерий дене акленыт. Тыгак чодыра пожар ваштареш кучедалме, чодырам уэмдыме паша лектышымат шотыш налыныт.

Тыгай окса полшым Ленинград, Тверь, Кострома, Вологод, Нижегородский, Калининград, Киров область-влак, Татарстан, Йӱдвел Осетий-Аланий, Марий  Эл республик-влак налыныт. Нине регион-влак чыла шотыштат сай лектышым онычыктеныт.

Ешартыш шийвундо ончыкыжымат чодыра пожар-влакым йӧрыктен толмо пашаште профилактикым эртараш да моло оперативный мерылан ойыралташ тӱҥалеш. Тидын шотышто РФ Правительствын пунчалже эше 2019 ий ноябрьыштак лектын.

 Кызыт Рослесхоз ты шотыштак 2020 ийыште паша кузе вораҥмым терген иктешла. Тидлан регионласе чодыра ведомство-влакын, кугыжаныш чодыра реестрын данныйыштым, тыгак план да план почеш огыл тергымаш-влакын лектышыштм шотыш налыт. Эн сай лу регионлан теният тыгай ешартыш окса полыш лиеш.

 Российысе Пӱртӱс поянлык министерствын пресс-службыжын уверже негызеш С.Носова ямдылен.

 

Опубликовать в Одноклассники

Добавить комментарий