8 июльышто Оршанке поселкышто футбол дене Марий Эл первенствын икымше лигыштыже верысе «Спутник» ден У Торъял район гыч «1 Май» команде-влак модыч.
Чыным ойлаш гын, чылт тыгай модмашыжым але марте телевизор дене веле онченам. Санденак шке шинча дене ужаш манын Торъялысе футболист-влак дене пырля мыят корныш тарванышым.
Игече ты кечын чотак ӧрыктарыше ыле. Эн ончычак кече изишак ончыш, вара йӱр йӱраш тӧчыш, икмыняр жап гыч сайынак оптале. А Какшанмучаш (Пектубаево) селан тӱҥ уремжын ик велныже пуйто шошывӱд йога – тайыл дене тунар лопкан ӱлыкӧ «чымалте».
Тиде селам эрталтымеке, эшеат ӧрна, вет асфальт корно воктене да посадкыште пушеҥге коклаште верын-верын ора денак лум киен! Тиде – кеҥеж рӱдыштӧ!..
Оршанкыш толын шумеке, адакат йӱр оптале. Йӧра, матч тӱҥалмылан лачак чарныш. Ик велым, сай: футболист-шамыч ӱмбаке кеч кӱшыч ыш його. Но мече почеш куржталмышт годым ӱлныжӧ, мландыште, мо ышталте?! Модмо пасушто южо вере лакыш вӱд тунар погынен ыле – кеч ведра дене коштал нал. Но мече почеш куржшыла, рвезе-шамыч тушко пурен лектедышт. Южышт кокланже эсогыл, яклешт камвозын, пӧрдалынат нальыч. Чыланат йол гыч тӱҥалын вуй марте лавырген, нӧрен пытеныт ыле. А нуно, чыла тиде нелылыкым шотыш налде, голым пурташ тыршышт. Икымше тайм тӱҥалтыштак «1 Май» команде 1:0 счетым ыштен керте. Шукат ыш эрте – «Спутник» счетым тӧремдыш. Ничья денак команде-влак каналташ кайышт.
Нелылыкым икымше тайм мучаште тӱҥалше йӱр ешарыш гына. Кӱдырчӧ кӱдыртыльӧ, волгенче «рашкалтыле», шолем «перкалыш» – кокымшо таймым чарат дыр манме оят йоҥгыш. Но уке. Лу минут наре гычрак тудо эркышныш да матч шуйныш.
А каналташ пуымо 10 минут жапыштыжат «1 Май» командын рвезыже-шамыч ыраш, изиш шӱлалташ але мушкылташ монь ышт тырше, а, модмо пасу воктене улшо пушеҥге-шамыч йымаке иквереш чумырген шогалын, вес таймыште кузе модшашым каҥашышт. Да арам огыл! Кокымшо таймыште эн ончычак «Спутник» эше ик голым пуртыш гына, модыш мучаште У Торъялын командыже 2:2 счетым ыштен керте. Тиде модыш гын модыш ыле!
Любовь Камалетдинова.
