24-25 ноябрьыште Кужэҥер посёлкысо школын спортзалыштыже спорт туризм дене республик кӱкшытан таҥасымашке регионысо 7 команде деч посна элнан 8 субъектше гыч команде-влак чумыргеныт. Ойыртемже – таҥасымаш леведыш йымалне эртен. Тыгайже тыште ынде йӱлаш пурен.
Икымше кечын 2-шо классан турист-шамычлан, а кокымшо кечын 3-4 классан спортсмен-влаклан старт пуалтын.
Верысе турист-влак тренер Зоя Пайдыганован воспитанникышт лийыныт: П.Волкова, Ю.Тамбасова, Ю.Ельмихеева, Н.Ямбаршев, Д.Волков, Д.Иванов, Д.Никитин, Д.Михайлов, Н.Березин, Д.Пушкин, А.Смоленцева, К.Петухова.
Тылеч ончыч спорт туризм дене Марий Элын чемпионатше эртен. Тушто 4 классан-влак (тӱҥ шотышто спорт мастер) вийыштым тергеныт. Пӧръеҥ ден ӱдырамаш-влак коклаште «Азимут» (Йошкар-Ола) команде ончылно лийын. Кужэҥер кундем гыч К.Михайлова (спорт мастер), П.Волкова (КМС), Ю.Тамбасова (1-ше разряд), Ю.Ельмихеева (1-ше разряд) кокымшо верым налыныт. Рвезе-влак командыште А.Павлов (Шернур, КМС), Р.Газизов (Марий Турек, 1-ше разряд), Д.Иванов (1-ше разряд), Д.Волков (1-ше разряд) кудымшо верыш лектыныт.
Марий Элын кубокшо верч таҥасымаште 3 классыште таҥасыше-влак коклаште Д.Иванов ден Д.Волков сеҥышыш лектыныт. Даниил Иванов 14-15 ияш участник-влак коклаште йолын коштмо кужытышто икымше верыш лектын, а Данил Волков – кумшо верыш. Когыньыштынат тренерышт – З.Пайдыганова.
– Тургым коклаште спорт туризм дене таҥасымашым спортзалыште эртараш пайдале, шонем. Верысе участник-шамычлан техникым саемдаш, опытым погаш тренировко семын лиеш гын, толшо-влак кыртменак таҥасат. Адакшым зданий кӧргыштӧ эртараш йӧнжат чыла вере уке. Мемнан дене лач Кужэҥер районысо ты школышто келыштаралтын, – манеш таҥасымашын организаторжо А.Алафузов. – Ты гана 220 участник вийжым терген, чылан тыршеныт. Путырак сайын верысе команде, оза-влак, выступатленыт. Тыгак «Виктория» СШОР-ын командыжым палемдыман. Черетан вес таҥасымаш, Марий Элын первенствыже, январьыште, ечыгорнышто лиеш.
Е.Эшкинина.
Кундемыштына спорт туризм, ориентирований дене тӱрлӧ кӱкшытан ятыр таҥасымаш эрта. Ты вид дене республикнан сборныйжо Российыштат сай результатым ончыкта.
Спорт туризм Кужэҥер, Шернур районлаште сайын вияҥеш. Куандара: ты кундем гыч кок-кум еҥ регион, Россий кӱкшытан таҥасымашлаште сеҥышыш лектеш, призёр радамыш логалеш.
