Кодшо рушарнян Морко районышто, Морко – Роҥго – Ургакш корнын 34-ше меҥгыштыже, шуко пассажирым наҥгайыше ПАЗ автобус корно ӧрдыжкӧ каен да шӧрын йӧрлын. Тушто Советский поселкысо «Акашевский» сурткайык фабрикыште ыштыше пашаеҥ-влак пашаш каеныт. Корно туткар эрдене куд шагат лишан лийын.
Автобусышто кумло наре еҥ кудалын. Чылаштлан гаяк медполыш кӱлын. Кудытшын кидше-йолжо, ӧрдыжлужо тугалтын але чот тӱкалтын, вӱр лекмеш удыралалтын. Нуным эмлымверыш пыштыме. Марий Эл МВД-н пресс-службыштыжо кок ӱдырамашын больницыш неле сусыр дене логалмышт нерген ойлат. 40 ияшыжын икмыняр ӧрдыжлужо тугалтын, 25 ияшыжын вуйгоҥгыраж ден вуйдорыкшо сургалтын да вуйгоҥгыраже ик вере печкалтын.
Аварийын амалже нерген тӱрлын ойлат.
— 57 ияш водитель рульым виктарышыжлак мален колтен. Тидын нерген тудо следственно-оперативный группын еҥже-влаклан шкежак каласен, — маньыч Марий Эл УГИБДД-н пресс-службыштыжо. – Сандене лач тидым тӱҥ амаллан шотлымо.
Но тыгай шомакат шоктен, пуйто автобус кудалышташ технически сайын ямдылыме лийын огыл. Эшеже калык эреак шуко кудалыштеш. Мутлан, йӱдвошт пашам ыштыше еҥ-влаклан шинчен каяш чылаштлан салонышто вер чӱчкыдын ок сите, сандене южыштлан нерен шоген каяш перна. Мален темдыме водительымат омо темдал кертын.
А.АНДРЕЕВ.
Снимкыште: аварий верыште.
(Марий Эл УГИБДД-н пресс-службыжын фотожо).
