Йодыш-влаклан Марий Эл Республикысе исправительный учрежденийлаште законым шуктымым эскерыме шотышо Йошкар-Олан прокуроржо Евгений Молчанов вашештен.
Образовательный школын тунемшыже-влакым тусо пӧлем ден кумдык-влакым эрыктыме пашашке ушаш лиеш мо?
И.Кутюбаев
Йошкар-Ола.
— РФ Конституцийын 37-ше статьяж дене келшышын, паша эрыкан. Кажне еҥ шке моштымашыж дене келшышын, тудым ыштен кертеш. Виеш пашам нигӧ нигӧмат ыштыктен огеш керт. Тыгайракак нормо РФ Паша кодексын 4-ше статьяштыже пеҥгыдемдалтын. «РФ-ште образований нерген» федеральный законышто ончыкталтын: шке ойырен налме почеш, тунемше-влак образовательный пашам шуктышо организацийын эртарыме мероприятийлашкыже ушнен кертыт, а тунемме планыш пурталтдымышкыже локальный нормативный акт дене пеҥгыдемдыме почеш. Образовательный программе дене келшен толдымо пашаш тунемше-влакым шкеныштын кумылышт, а ийготыш шудымо-влакым ача-аван (законный представительын) келшымышт почеш гына ушаш лиеш. Икшывым школышто пашам ыштыкташ келшыме шотышто посна документ лийшаш. Ача-аван келшымыж деч посна йочам школышто, эсогыл классыште дежуритлыкташ, кумдыкым эрыктыкташ, кеҥежымсе паша практикыш ушаш да т. м. огеш лий.
С.НОСОВА
